Менделеевские новости
  • Рус Тат
  • Гомер баешлары тыныч, бәхетле

    Фәимә Вахриева Язмыш җиле тыл һәм хезмәт ветераннары Рәзимә һәм Габдулла Исмәгыйловларны кайда гына йөртмәгән: Пермь, Чиләбе шахталарында, Яр Чаллы төзелешендә... Әмма картлыкларын Рәзимә Миңнемөхәммәтовнаның туган якларында уздырырга ниятлиләр. Язмабыз геройларының бала чаклары авыр хатирәләргә бәйле сугыш утына уралган. Әтиләрен фронтка алганда биш баланың иң өлкәне Рәзимәгә 12 яшь була....

    Фәимә Вахриева
    Язмыш җиле тыл һәм хезмәт ветераннары Рәзимә һәм Габдулла Исмәгыйловларны кайда гына йөртмәгән: Пермь, Чиләбе шахталарында, Яр Чаллы төзелешендә...
    Әмма картлыкларын Рәзимә Миңнемөхәммәтовнаның туган якларында уздырырга ниятлиләр. Язмабыз геройларының бала чаклары авыр хатирәләргә бәйле сугыш утына уралган. Әтиләрен фронтка алганда биш баланың иң өлкәне Рәзимәгә 12 яшь була. Ә бишектә калган сабыйга бөтенләй дә әти назын күрергә язмый, гаилә башы чит җирләрдә башын сала. Хәтимә апа иренең балаларына белем бирү хыялын тормышка ашыра алмый, чөнки бөтен тырышлыгын сабыйларын ач-ялангач итмәүгә юнәлтә.
    - Алтын куллы әниебез киндер сукты, шуннан күлмәк-ыштанын да, бишмәтен дә юнәтте, юк кына әйбердән ризыгын да әзерли белде. Соңрак, үзем гаиләле, балалы булып дөнья көтә башлагач кына, аның хәлен төптән аңладым, - дип сөйли язмабыз герое.
    Әңгәмәгә Габдулла бабай кушыла:
    - Ничек кенә булса да, син ана җылысында үскән бәхетле җан. Мин "Әниең үги булса, әтиең - җизни" дигән әйтемне тулысы белән үз җилкәмдә татыдым. Иң авыр эш, иң караңгы чырай безгә - дүрт ятимгә тиде. Көннәр әнилеләр тормышына кызыгып, күз яшен йотып узды.
    Тоймадан Камайга җәяү йөреп җиденче сыйныфны яхшы тәмамлаган Рәзимә Алабугада китапханәче һөнәрен үзләштерә. Биектау районына юллама белән килгән кызны Габдулла бер күрүдә ошата. Һәр эштә янып тора, җырлый, бии, спектакльләрдә уйный. Сылуны күпләр күзли, тик өлгер егет Рәзимәгә озак уйларга вакыт бирми - урлап алып кайта. Йорттагылар киленне теләми генә кабул итә. Бар уйлары яшь гаиләгә аяк чалу, араларын бозу. Яшьләр, үги бием ананың кыерсытуына түзә алмыйча, авылдан чыгып китәләр. Чит-ят җирләрдә озак кына бәхет эзләп йөриләр. 1972 елда Яр Чаллыга кайтып урнашалар. Тырышып-тырмашып йорт җиткерәләр. Гаилә оясында өч бала үсә. Тормыш акрынлап җайга салына. Су басу җирендә төзелгән йортлары өчен уңайлы фатир бирәләр. Рәзимә госстрахта агент эшен башкара. Уңай холыклы, аралашучан хезмәткәр коллективта хөрмәт казана. Утыз елга якын стаж туплаган Р.Исмәгыйлова шул учреждениедән лаеклы ялга чыга.
    Сугыш кырына алынган ирләрне унике яшьтән алыштырган Габдулла өлкәннәрдән бер дә калышмый. Тыл "фронтында" алган чыныгу гомергә җитә. Соңрак егет ФЗӨдә шахтер һөнәренә төшенә һәм 18 ел гомерен шул өлкәгә багышлый. Чаллыда агач эшкәртү комбинатында агач эшен үзләштерә.
    Исмәгыйловлар җәйләрен Тоймада ата-ана йортында уздыралар. Кулы хезмәткә күнеккән ветеран әле дә амбарда булыша.
    - Җентекләп чутласаң, стаж алтмыш елдан артты инде, ә күңел һаман яшь, җилкенә, - дип көлә ул.
    Күтәрмәслек кайгы кичергән Исмәгыйловларга (уллары авариядә, бер кызлары авыр чирдән вафат булган) ул вакытлар турында сөйләү түгел, искә төшерүе дә авыр.
    - Яшәргә, бирешмәскә, Аллаһы Тәгалә биргән гомерне лаеклы үтәргә кирәк. Хәзер бар сөенечебез - кызыбыз Илсөяр, биш оныгыбыз, өч оныкчыгыбыз, - диләр алар.
    Тугызынчы дистәләрен ваклаган парлар бер-берсен кайгыртып, кадерләп яшиләр һәм шуның белән бәхетлеләр.
    Фото гаилә архивыннан
    Нравится
    Поделиться:
    Реклама
    Комментарии (0)
    Осталось символов: