Менделеевские новости
  • Рус Тат
  • Ул бөек елларга баш иябез

    Җиңү парадында катнашучылар иртәнге 9 сәгатькә Ленин мәйданына җыелды. Бөек Ватан сугышында катнашкан А.Волков һәм Н.Ксенофонтов көн геройлары буларак иң беренчеләрдән мәйданга ашыктылар. Алар фонтан янындагы эскәмиягә җайлап урнаштылар һәм яннарына килгән тыл ветераны Т.Гыймазетдинов белән әңгәмә корырга керештеләр. "1945 елның Җиңү көнен сез кайда каршыладыгыз? - дигән сорауга Орел-Курск...

    Җиңү парадында катнашучылар иртәнге 9 сәгатькә Ленин мәйданына җыелды.
    Бөек Ватан сугышында катнашкан А.Волков һәм Н.Ксенофонтов көн геройлары буларак иң беренчеләрдән мәйданга ашыктылар. Алар фонтан янындагы эскәмиягә җайлап урнаштылар һәм яннарына килгән тыл ветераны Т.Гыймазетдинов белән әңгәмә корырга керештеләр.
    "1945 елның Җиңү көнен сез кайда каршыладыгыз? - дигән сорауга Орел-Курск дугасындагы бәрелешләрдә катнашкан, Сталинград өчен сугышкан Александр Дмитриевич Волков хатирәләре белән уртаклашты.
    - Ул вакытта без Чехословакиядә Иглава шәһәрен азат итүдә идек. Җирле халык безне азык-төлеккә күмде. Кешеләр факел күтәреп урамнарга чыктылар. Гомумән шатлыкның чиге булмады. Аннан без Прагага юнәлдек, француз чигендә, аннан Япониядә булдык. Тынлы оркестр башкаруындагы сугыш еллары җырлары яңгыравы астында ветераннар белән беррәттән предприятие һәм оешма хезмәткәрләре колоннасы һәр елны митинг үткәрелү урыны - Хәтер мәйданына таба юл алдылар.
    Район башкарма комитет җитәкчесе исеменнән аның урынбасары Алексей Корниенко ихластан котлау сүзләре яңгыратты.
    - Дары исе иснәгән, Җиңү көненең чын бәһасен аңлаган, тылда хезмәт куйган ветераннарга хөрмәт йөзеннән баш иябез. Сугыш афәте тормышыбызны караңгылатмасын иде, - диде Алексей Александрович.
    Район кураторы Д.Иванов, ветераннар советы рәисе Л.Сорокина, хәрби комиссар Д.Вәлиев, шәһәрнең почетлы гражданины В.Георгиевский бәйрәм белән котлауларга кушылдылар.
    Һәлак булганнар бер минутлык тынлык һәм мылтыктан атулар белән искә алынды. Билгесез солдат һәйкәленә Җиңү солдатларына тирән ихтирам йөзеннән чәчәк букетлары, гирляндалар салынды.
    Яу кырында мәңгегә ятып калганнарның исемнәре мәрмәргә уеп язылган мемориалга чәчәкләр салырга бу көнне йөзләгән менделеевлылар чыктылар. Хезмәт ветераны Ф.Вафина да бар алар арасында. Аның әтисе - Минһаҗетдин Абзалетдиновның исеме исемлектә беренче тора.
    - Химия заводында эшләгәндә 1943 елда аны фронтка алалар, 1944 елда һәлак була, - дип сөйли әңгәмәдәшем күз яшьләрен сөртеп, мин бүген үземнең оныкларым белән килдем, алар да бабаларының әтисе турында белсеннәр.
    А.Кочергин әтисенең абыйлары исеме язылган турда туктый.
    - Минем дүрт абыем сугышка китә, икесе - Александр һәм Геннадий Кочергиннар һәлак булалар. Безгә сугыш чоры балаларына да ачлык-ялангачлыкны бик иртә татырга туры килде, - дип сөйли Адольф Иванович.
    Үзләренең исемнәрен бетмәс данга күмгән якташларыбызның якты истәлегенә салынган Геройлар Аллеясы буйлап район җитәкчеләре һәм ветераннар атлый.
    Митинг тәмамланды, бәйрәм дәвам итә: кыр кухнясында пешерелгән карабодай боткасы менделеевлыларны хуш исе белән үзенә җәлеп итә, концерт программасы тулы көчкә бара.
    Кичен Менделеев мәйданында концерт, ветераннар балы һәм онытылмас Җиңү салюты булды.

    Нравится
    Поделиться:
    Реклама
    Комментарии (0)
    Осталось символов: