Менделеевскида мобилизацияләнгәннәрнең һәр гаиләсенә куратор беркеттеләр

Татарстан Республикасы Президенты Рөстәм Миңнеханов йөкләмәсе буенча, Менделеевск районы җитәкчелеге һәм депутатлар мобилизацияләнгәннәрнең гаиләләренә баралар. Бер атна дәвамында 150 гаиләдә булдылар. Бу турыда хакимияттә узган эшлекле киңәшмәдә район башлыгы Радмир Беляев сөйләде.

«Мондый очрашуларда актуаль мәсьәләләр һәм аларны чишү юлларын, яшәү шартларын тикшерәбез. Һәр гаиләгә район хакимиятеннән һәм депутаттан куратор билгелибез. Бер атна эчендә мобилизацияләнгәннәрнең 150 гаиләсендә булдык. Без үзебезнекләрне ташламыйбыз һәм һәр мобилизацияләнгән ир-ат, аларның гаилә әгъзаларына ярдәм күрсәтеләчәк», — дип билгеләде район башлыгы.

Аның сүзләренчә, җирле бюджет һәм мобилизацияләнгәннәрнең гаиләләренә ярдәм итү штабы белән төрлечә ярдәм күрсәтелә. Мисал өчен, җир участогына бәйле документларны рәсмиләштерүгә йогынты күрсәтү, терлек асрау өчен азык һәм дарулар илтү һәм башкалар.