Татарстанда көчле җил һәм яшен көтелә

Бүген көндез һәм кичен Татарстанда яшен һәм кыска вакыт эчендә тизлеге секундына 17 метрга кадәр көчәюче җил көтелә. Моның турында Татарстан Республикасы Гидрометеоүзәге хәбәр итә. 

Иртәгә, 23 июндә исә Татарстанда аязучан болытлы һава торышы көтелә, урыны белән яңгыр яварга мөмкин. Төнлә һава температурасы 4-9 градус тәшкил итсә, көндез +21 градуска кадәр күтәреләчәк. 

Ял көннәренә термометр күрсәткече бераз күтәреләчәк. 24нче июнь, шимбә көнне һава +22 градуска кадәр, ә якшәмбе көнне +24 градуска кадәр җылыныр дип көтелә. Төнлә температура 5-11 градус аралыгында сакланачак, урыны белән яңгырлар явып узачаклар.

Синоптиклар фаразлавынча республикага җылылык киләсе атна башында аяк басачак. 26-27 июньнәрдә һава +20...+26 градуска кадәр җылыначак.