«Алтын башак» алдынгылыкта

Районда язгы кыр эшләре ахырына якынлаша. Быел чәчүлекләр 25766 гектарны тәшкил итәчәк. Авыл хуҗалыгы предприятиеләре чәчүне төгәлләделәр диярлек, шулар арасыннан «Алтын башак» - беренчеләрдән булып.

Азат Галимуллин җитәкләгән хуҗалык уңышлы үсә һәм алдынгы позицияләрне били.

- Мең гектарда сабан культуралары чәчтек, 388 - азык культуралары һәм йөз гектарда күпьеллык үләннәр, - ди баш агроном Михаил Никандров.

Язгы кыр эшләренә 14 кеше җәлеп ителде. Чәчү агрегатларында Михаил Васильев һәм Иван Григорьев хезмәт куйды.

- 360 гектарда тырмалау башкардым. Эшләр кызу бара, норманы үтибез, - дип бүлеште Иван Владимирович.

Басуларда җанлылык таңнан кичкә кадәр хөкем сөрә. Туфрак эшкәрткәндә МТЗ-1221 һәм К-700 тракторчылары Роберт Ефремов һәм Максим Куртеев югары нәтиҗәлек күрсәттеләр.

«Алтын башак» җитәкчесе һәм хезмәткәрләренең тәҗрибәсе һәм җаваплылыклары зур. Алар тырышлык, эш сөючәнлек белән аерылып торалар, шуңа күрә нәтиҗәсе дә бар.