Авылның киләчәге өметле
Авылда күп кенә яшь гаиләләр махсус программа нигезендә яшәеш шартларын яхшырта. Песәйдә дә йорт төзергә теләүчеләр аз түгел. Авылның Дала тыкрыгында йортлар гөмбәләр кебек үсә. "Мөхәммәтгалиев" крестьян-фермер хуҗалыгында механизатор буларак тырыш хезмәт күрсәтүче Ринат Шириевның йорты тыкрыкта алтынчы. Актаныш районында ишле гаиләдә туып үскән Ринатның тамырлары ныклап җиргә береккән. Әти-әнисе...
Авылда күп кенә яшь гаиләләр махсус программа нигезендә яшәеш шартларын яхшырта.
Песәйдә дә йорт төзергә теләүчеләр аз түгел. Авылның Дала тыкрыгында йортлар гөмбәләр кебек үсә. "Мөхәммәтгалиев" крестьян-фермер хуҗалыгында механизатор буларак тырыш хезмәт күрсәтүче Ринат Шириевның йорты тыкрыкта алтынчы.
Актаныш районында ишле гаиләдә туып үскән Ринатның тамырлары ныклап җиргә береккән. Әти-әнисе үрнәгендә эшкә батыр, хезмәт сөючән. Ул иген игүнең бөтен нечкәлекләре белән комбайнчы буларак таныша.
Песәй кызы Гүзәлия белән гаилә коргач, бераз Яр Чаллыда яшиләр, әмма язмыш җиле аларны авылга кайтара. Моңа кадәр әтиләре Мулланур йортында яшәгән Шириевлар дәүләт булышлыгына таянып, күптәнге хыялларын тормышка ашыруга керешәләр. Халыкта "йорт салуның ние бар" диелсә дә, бу эшнең җиңел түгеллегенә тиз инаналар. Авыл хезмәтчәне кояш күтәрелгәннән алып төнге күктә ай калыкканчы кырда, үз хуҗалыгында ишегалды тутырып мал асрый. Гомумән, язмабыз герое әйтмешли, тын алырга да вакыт юк. Дөрес, 45 ел хуҗалыкта көтүче булып эшләгән Мулланур ага йорт-җир тирәсендә зур булышчы, үсеп килүче улы - 7 нче сыйныф укучысы Ринас та читтә калмый. Кечкенә Эльвина күбрәк әнисе тирәсендә бөтерелә. Ул быел беренче сыйныфка керәчәк. "Кристалл" бию төркемендә тырышып шөгыльләнә.
Без очрашкан көнне Ринат Рафаилович ярдәмгә килгән энесе Флорид белән яңа йортка су үткәрү эшләре белән мәшгуль иде. Мондый вакытта туганнарның иңен тою үзе көч-куәт бирә. Хуҗа белдерүенчә, күп мәшәкатьләр инде артта калган - ут үткәрелгән, җылыту батареялары урнаштырылган. Планда - газ тоташтыру. Йорт эчендә бизәү-матурлау эшләре бара. Койма тотылган, ишегалдында сарай күтәрелеп килә. Крестьян җирне буш яткырырга күнекмәгән: бакчада өлгергән печән чабылган. Киләчәктә башкарыласы гамәлләр дә чиратын көтә: мунча, гараж төзү. "Без өлгергәнче үсеп китмәсә, кызга уйнар өчен мәйданчык та булдырырга иде", - дип елмая Ринат.
Сәламәт тормыш рәвешен үз иткән, гаиләсе, туганнары өчен җан атып торган Р.Шириев, яшь булуына карамастан, хуҗалыкта да хөрмәт казанып өлгергән. Чәчү һәм уңыш җыю чорында ел да алдынгылар сафында. Аның тырыш хезмәте күптөрле Мактау грамоталары, медальләр белән билгеләнгән. Казанда үткәрелгән авыл хуҗалыгы хезмәткәрләре тантанасында да катнашкан. 2009 елда чәчү батыры булуы белән дә горурлана. Менә шундый тырыш, киләчәккә ышаныч белән караган яшьләр булганда, авылыбызның иртәгәсе өметле.
Телефон АО «ТАТМЕДИА»: (843) 222 09 84