Менделеевск яңалыклары
  • Рус Тат
  • Авырлыклар безне сындырмады

    Ижёвкада гомер кичерүче тыл һәм хезмәт ветераны Мирзакаева Каюма Дәүләтшевна Җиңү бәйрәме алдыннан якыннары янәшәсендә 95 яшьлек юбилеен каршылады. Район башлыгы урынбасары Рөстәм Хәбибуллин, ветеранны беренче җитәкче Игорь Привалов исеменнән котлап, аңа Россия Федерациясе Президенты Владимир Путинның истәлекле адресын, чәчәк бәйләме һәм бүләк тапшырды. Котлауларга җирлек башлыгы Валентина Пономарёва да...

    Ижёвкада гомер кичерүче тыл һәм хезмәт ветераны Мирзакаева Каюма Дәүләтшевна Җиңү бәйрәме алдыннан якыннары янәшәсендә 95 яшьлек юбилеен каршылады.
    Район башлыгы урынбасары Рөстәм Хәбибуллин, ветеранны беренче җитәкче Игорь Привалов исеменнән котлап, аңа Россия Федерациясе Президенты Владимир Путинның истәлекле адресын, чәчәк бәйләме һәм бүләк тапшырды. Котлауларга җирлек башлыгы Валентина Пономарёва да кушылды.
    Каюма Мирзакаева тумышы белән Тойгуҗа авылыннан.
    - Тамырыбыз шул яктан, шунда туып үстем, ирем Габдулла белән танышып гаилә кордык, балаларыбыз дөньяга килде. Дүртесе дә йөзгә кызыллык китермәделәр, картлык көнемдә мине кадерләп тәрбиялиләр. Кайчандыр ирем белән иркәләп баккан күз нурларым миңа бәхетле гомер көзе бүләк иттеләр, - дип сөйли юбиляр.
    Сугыш башланганда 24 яшен тутырган Габдулланы 1942 елның гыйнварында хәрби комиссариат чакыруы буенча фронтка алалар. Каты бәрелешләрнең берсендә кыйпылчык тиеп авыр яраланган, контузияләнгән солдат госпитальдән госпитальгә күчеп озак дәвалана. Сәламәтлеге ныклап какшаган Габдулланы "фронтка яраксыз" кәгазе биреп тылга озаталар. Бар хуҗалык эше хатын-кызлар, балалар, картлар җилкәсенә калган чорда, әлбәттә, ул кул кушырып утыра алмый. Хезмәтнең җиңелен-авырын аермый, колхоз эшенә чума. Комбайнда, соңрак Ижёвкада санаторий төзелешендә, "Шифалы су" заводында хезмәт куя. 1942 елда туган беренче балаларының үлеме гаилә өчен авыр сынауга әверелә.
    Хәзер Каюма Дәүләтшевна сигез оныгы, 12 оныкчыгына сөенеп яши. Күптән түгел оныгының бәбие туу зур вакыйга булган. Димәк, Мирзакаевларның буын чылбыры озыная бара.
    - Күргән кыенлыклар артта калды, яшь, егәрле вакыт иде, бирешмәдек. Хәзерге тыныч, бәхетле тормышым - иң зур байлыгым. Кызым Альбина йорт аркылы гына яши. Пенсиядә булса да, санаторийда эшли. Мин сатучы, Ижёвкага күчкәч хастаханәдә бухгалтер, соңрак "Шифалы су" заводында цех начальнигы булдым, - дип хезмәт юлы белән таныштыра ветеран. Каюма Дәүләтшевнаның эш стажы 44 елдан артык.
    - Егәрем булса, әле дә өйдә утырмас идем, - дип шаярта ул. Хәзер дә тәмле бәлешләр, пилмәннәр белән балаларын сыйлый.
    - Озын гомер, яшемә күрә сәламәтлек биреп, кадерле әни-әби булуыма Аллаһы Тәгаләгә мең рәхмәтлемен, - ди.
    Фәймә Вахриева

    Иң мөһим һәм кызыклы язмаларны Татмедиа Telegram-каналында укыгыз


    Нравится
    Поделиться:
    Реклама
    Комментарии (0)
    Осталось символов: