Бәзәкәдә Мәүлид кичәсе

Мәүлид - сөекле Пәйгамбәребез хәзрәте Мөхәммәд Мостафаның (с.г.в.) туган кичәседер. Ул барыбыз өчен дә кадерле.
Шул уңайдан Бәзәкә мәчетендә Мәүлид кичәсе оештырылды. Чарага 35 кеше килде. Бәйрәмне күптән түгел генә мулла вазифаларын башкаруга керешкән Мансур Гәрәев ачты. Ул олуг бәйрәмнең бөтен дөнья мөселманнары өчен зур әһәмияткә ия булуын, рухларыбызга яктылык, күңелләребезгә шатлык китерүен ассызыклады.
Менделеевскиның "Таң" мәчетенә яңа билгеләнгән имам-хатыйп Ирек Нуриев гади, аңлаешлы итеп Пәйгамбәребезнең тормышы, аның күркәм сыйфатлары, җәмгыятьтәге вәзгыят турында бәян итте. Сүзләрен гыйбрәтле мисаллар, хәдисләр белән тулыландырды.
Азан әйтүче мөәзин Нәгыйм Әхмәтсәхипов мәчеттә озак еллар мулла булып торган Мехәммәтнур Сабитовка, аны алыштырган Минемулла Хуҗинга рәхмәт белдерде.
Остабикә Фәния Гайнетдинова да үз фикерләрен җиткерде:
- Иман йортында өйрәтелүче дин сабакларына хатын-кызлар актив йөри. Алар өч төркемдә белем алалар. Өлкән апаларның барысы да гарәпчә укый белә. Яшьрәкләргә гарәп графикасын, дин сабакларын, намаз уку тәртибен авылдашыбыз Гамилә Галимова өйрәтә. Ул, Алабугада яшәвенә карамастан, билгеләнгән уку көннәрен калдырмый. Шуны да әйтергә кирәк, быел ул гаиләсе белән Хаҗга барып, Аллаһыга гыйбадәт кылып кайтты. Мөгаллимә бер төркемгә сабак бирүне миңа ышанып тапшырды.
Чыгышлар тәмамлангач, Ирек хәзрәт дини викторина үткәрде, дөрес җавап бирүчеләрне китаплар белән бүләкләде. Вакытлары кергәч, Икенде, Ахшам намазлары укылды, Пәйгамбәребезгә багышлап салават әйтелде.
Мәүлид кичәсе мул чәй табыны артында дәвам итте. Һәркем өеннән әзерләп сый-нигъмәтләр алып килгән иде.
Рәмзия Мөхетдинова