Халык җыены – Турайда

Дүшәмбе көнне район җитәкчесе Игорь Привалов катнашында Турай җирлегендә яшәүчеләр җыены булды.

Иң элек Турай җирлеге башлыгы Әлфирә Рәхимованың узган елдагы эшчәнлеккә отчет доклады тыңланды. Анда билгеләп үтелгәнчә, җирлек составына ике - Турай һәм Татар Әхтиялы авыллары керә. Турайдагы 168 йорт хуҗалыгында - 454 кеше, Татар Ахтиялында 49 хуҗалыкта 121 кеше яши. 2011 елда 6 кеше туган, 14 кеше вафат булган. Бүгенге көндә мәктәпкәчә яшьтәгеләр - 38 бала, 51 бала мәктәптә белем ала, 37 студент - төрле уку йортларында, 4 егет армия сафларында хезмәт итә. Эшкә сәләтлеләр 258 кеше булса, шуның 27се крестьян-фермер хуҗалыгында эшли. Җирлек территориясендә 173 пенсионер исәпләнә.
Ел дәвамында халыктан 49 мөрәҗәгать кабул ителгән. Барысы да канәгатьләндерелгән.
Бюджет чыгымнарын оптимальләштерү максатында Турайда мәктәп, балалар бакчасы, ФАП - бер бинада, библиотека, җирле үзидарә, мәдәният йорты бер түбә астында. Татар Ахтиялы клубы, ФАП шулай ук берләштерелде.
Җирлек территориясендә авыл хуҗалыгы өлкәсендә өстенлекле милли проектларны тормышка ашыру - җирле үзидарә эшчәнлегенең өстенлекле юнәлешләреннән берсе. Шәхси ярдәмче хуҗалыкны үстерүгә 2011 елда ун гаилә 1048 мең сумга кредит алды. Аны сарай төзү техника һәм терлек сатып алуга кулландылар.
"Яшь гаилә" программасы кысаларында 10 йорт төзелде, сигез гаилә төзелешне дәвам итә.
Урамнарны яктырту, су белән тәэмин итү, салымнар җыю, территорияне яшелләндерү, һәм төзекләндерү, буш объектларны рәсмиләштерү һәм башка мәсьәләләр күтәрелде халык җыенында.
Крестьян-фермер хуҗалыгы башлыгы Наил Нигъмәтҗанов чыгышы узган елдагы эшчәнлек йомгаклары һәм киләчәккә бурычлар билгеләүгә багышланды. Авыл хуҗалыгы берләшмәсе 2002 елда оешкан. Төп эшчәнлек юнәлешләре - ит, сөт һәм ашлык җитештерү.
Даими эшчеләре - 27 кеше. Урак өсте һәм терлек азыгы әзерләү чорында читтән белгечләр чакыртырга туры килә. Уртача хезмәт хакы - 6500 сум, механизаторлар һәм сыер савучыларныкы аннан да күбрәк. Хуҗалыкта энергия ресурсларына чыгымнарны экономияләү буенча системалы эш алып барыла.
Киләчәктә терлекләрнең продуктлылыгын арттыру, авыл хуҗалыгы тармаклары - терлекчелек һәм кырчылык өлкәсендә заманча технологияләр куллануны кертү планлаштырыла.
Участок вәкиле Валерий Вәлиев үз чыгышын хокук бозуны профилактикалау, җинаятьчелек, террорга каршы көрәш, яшүсмерләр һәм уңышсыз гаиләләр белән эшләүне активлаштыруга багышлады.
Чыгышларны йомгаклап, район җитәкчесе Игорь Привалов җирлек территориясендәге проблемаларга тукталды. Эшче куллар, эш урыннары җитмәү, мәктәпне саклап калу, мәчеткә газ кертү, үзмәшгүльлегеңне оештыру, гаилә фермалары булдыру, территорияне төзекләндерү һәм башкалар турында сөйләшү булды җыенда. Игорь Анатольевич авыл халкы кузгаткан мәсьәләләрне шәхси контроленә алды һәм якын киләчәктә мөмкинлектән чыгып, хәл итү юлларын эзләячәге турында ышандырды.
Җыен азагында булачак РФ Президенты сайлауларына әзерлек турында игълан ителде. И.Привалов халыкны сайлауда актив катнашырга, илебез киләчәге һәм үз язмышыбызга битараф булмаска өндәде.