Авыл
.jpg)
.jpg)
Татар Чаллысы халкы җирле үзидарә моделен күрсәтте
Дүшәмбе көнне район җитәкчесе Валерий Чершинцев Татар Чаллысы авылы халкы белән очрашты. Җирлек эшчәнлеге турында отчёт белән башлыгы Татьяна Кузнецова чыгыш ясады. Ул билгеләп үткәнчә, проблемалы мәсьәләләрнең кайберләре авыл халкы йогынтысы белән хәл ителде. - Барлык проблемаларны да җирлек бюджеты акчасы хисабына хәл итеп булмаганын халык аңлый. Шунлыктан, халык яшәешен...
Дүшәмбе көнне район җитәкчесе Валерий Чершинцев Татар Чаллысы авылы халкы белән очрашты.
Җирлек эшчәнлеге турында отчёт белән башлыгы Татьяна Кузнецова чыгыш ясады. Ул билгеләп үткәнчә, проблемалы мәсьәләләрнең кайберләре авыл халкы йогынтысы белән хәл ителде.
- Барлык проблемаларны да җирлек бюджеты акчасы хисабына хәл итеп булмаганын халык аңлый. Шунлыктан, халык яшәешен яхшырту белән бәйле теге яки бу чараларны үтәүгә средстволар җыю турында карарлар чыгарабыз. Шулай күмәк көч белән Мохначёв һәм Җиңү урамнарында суүткәргеч челтәрен ремонтлау, җирле халык өчен авария куркынычы тудырган карт агачларны кисү кебек мәсьәләләр гамәлгә ашырылды. Бюджетны оештыруда күләмле өлеш кертүче "Менделеевсказот" предприятиесенең иганәчелек ярдәме хисабына Бөек Ватан сугышында һәлак булганнарга һәйкәл тәртипкә китерелде. Ничек кенә катлаулы булмасын, торак-коммуналь хезмәтләргә бурычны каплау мәсьәләсе дә хәл ителә. Бүгенге көндә ТКХ хезмәтләре өчен агымдагы түләү 106 процент тәшкил итә, күпкатлы йортлар буенча - 97%, - дип мәгълүмат бирде Татьяна Петровна.
Докладчы билгеләп үткәнчә, агымдагы елда авыл Советы Татарстанның муниципаль районнары арасында социаль проектлар конкурсында "Мин бу җирне ватаным дип атыйм" исемле проект белән җиңүче булды һәм 580 мең сумлык грант алды.
- Проект авылыбызның 400 еллыгына багышланды, "Бердәм Россия" партиясе эгидасында "Юность" РМЙ, авыл Советы һәм авыл мәдәният йортының күмәк көче белән әзерләнде, - диде ул.
Участковый Рамил Фәйзуллин җирлек территориясендәге оператив хәл белән таныштырды. Хәрби комиссар Дамир Вәлиев контракт буенча хезмәт шартлары турында мәгълүмат бирде.
Әйтелгәннәрне анализлап, район җитәкчесе Валерий Чершинцев халык белән эшләүнең нәтиҗәле формаларын һәм алымнарын куллануны хуплады.
- Биредә аерым эш юнәлешләре буенча җирле үзидарә моделе сурәтләнә, кешеләр җыенда мөстәкыйль рәвештә проблемалы мәсьәләләрне күтәрәләр һәм күмәк көч белән, читтән ярдәм көтмичә, үзләре үк аларны хәл итәләр. Бу дөрес, Татар Чаллысы җирлегенең эш тәҗрибәсен башка җирлек башлыкларына да үрнәк итеп алырга кирәк, - диде Валерий Сергеевич.
Халык авыл территориясенең үсеш перспективасы белән кызыксынды, урамнарны яктырту, авыл эчендә юл билгеләре урнаштыру һәм кышкы чорда кардан чистарту проблемаларын күтәрде.
Валерий Чершинцев "Жилэнергосервис" предприятиесе директорына килешү нигезендә урамнарны яктырту буенча электр линияләрен торгызуны йөкләде һәм кыш көннәрендә кар көртләрен тиз арада чистарту өчен мобиль техника әзерләнәчәге турында ышандырды.
- Барлык проблемалы мәсьәләләр буенча хакимиятнең кабул итү бүлмәсенә мөрәҗәгать итәргә була. Ул мәгълүмат миңа җиткереләчәк. Бергәләшеп проблемаларны хәл итә алырбыз, дип уйлыйм, - дип сүзен йомгаклады Валерий Сергеевич.
Следите за самым важным и интересным в Telegram-каналеТатмедиа
Нет комментариев