Татар Чаллысында Раштуа ярминкәсе
Дүртенче ел рәттән Татар Чаллысы авылында Раштуа ярминкәсе киң колач белән уза. Җирлек башлыгы Татьяна Кузнецова эгидасында бюджет өлкәсе учреждениеләре хезмәткәрләре ата-бабалар традицияләрен яңарту өстендә тыгыз элемтәдә эшлиләр. Көн салкын булуга карамастан, Мәдәният йорты каршындагы мәйданда халык күп җыелды. Дәртле музыка, шаян такмаклар һәм биюләр кешеләрне әйлән-бәйләнгә дәште. Бала-чага хәрәкәтле...
Дүртенче ел рәттән Татар Чаллысы авылында Раштуа ярминкәсе киң колач белән уза.
Җирлек башлыгы Татьяна Кузнецова эгидасында бюджет өлкәсе учреждениеләре хезмәткәрләре ата-бабалар традицияләрен яңарту өстендә тыгыз элемтәдә эшлиләр.
Көн салкын булуга карамастан, Мәдәният йорты каршындагы мәйданда халык күп җыелды. Дәртле музыка, шаян такмаклар һәм биюләр кешеләрне әйлән-бәйләнгә дәште. Бала-чага хәрәкәтле уеннарда катнашты, җитезлек һәм тапкырлык күрсәткәннәре чараны оештыручылардан призлар алды.
Мангаллардан шашлыкның хуш исе тарала. Авыл хуҗалыгы һәм халык иҗаты товарлары күргәзмәсе игътибарны җәлеп итә.
- Күргәнегезчә, монда кәбестәнең ниндие генә юк: тозлы, ачытылган, свежий. Бу юкка гына түгел. Безнең әби-бабаларыбыз кәбестәнең төрле сортларын үстерү белән шөгыльләнгән, аларны сатып алырга төрле яклардан килгәннәр. Без авылга "кәбестә" брендын кире кайтарырга телибез, - ди мәдәният йорты директоры Флёра Халикова.
Район башлыгы Валерий Чершинцев авыл халкы һәм кунаклар белән бергә шатлыклы вакыйганы уртаклашты.
Җыелганнарны сәламләп, Валерий Сергеевич болай дип билгеләп үтте:
- Җирле үзидарә органнарының бурычы - ата-бабалардан калган иң яхшы традиция һәм йолаларны саклап калу һәм яшь буынга тапшыру.
ТР Дәүләт Советы депутаты ярдәмчесе Рөстәм Гафаров һәм җирлек башлыгы Татьяна Кузнецова чарада катнашучыларга уңышлар, бәхет һәм иминлек теләделәр.
"Бердәм Россия" партиясенең җирле бүлекчәсе башкарма комитеты җитәкчесе Клавдия Смирнова аз керемле гаиләләрдән уку алдынгыларына сәяси совет исеменнән татлы бүләк тапшырды.
Монаш, Яңабирде, Илнәт һәм Тихоново җирлекләренең фольклор коллективлары бәйрәмгә зур концерт программасы белән килделәр.
Хуҗалар - "Рождественские напевы" вокаль ансамбле очкынлы номерлары белән куандырды, алар рус халык җырларын башкардылар.
- Массалы чара үткәрү белән бәйле иң җаваплы көннәрдә мәдәният хезмәткәрләре бер-берсенә ярдәмләшеп, бер гаилә булып эшләделәр. Бүгенге кискен үзгәргән һава торышыннан Татар Чаллысы клубының яңа аппаратурасы сафтан чыкты. Чараны өзмәс өчен, Гассар исемендәге мәдәният сарае хезмәткәрләре коллегаларына ярдәмгә килде, - диде район башкарма комитетының Мәдәният идарәсе начальнигы Лилия Галиева.
Бу вакытта кыш бабай (Марсель Закиров), Кар кызы (Любовь Мингалиева), Кыш (Татьяна Сандакова), Шамакайлар катнашында сәхнәләштерелгән тамаша күрсәтелде.
Мәдәният йорты фойесындагы бәйрәм табыны сый-нигъмәтләрдән сыгылып торды. Теләгән кеше самовардан чәй эчте, камыр ризыкларыннан һәм башкасыннан авыз итте.
- Татар Чаллысын безнең әти-әниләр һәрвакыт рухи мәдәният үзәге дип атады. Биредә әйләнә-тирәдә бердәнбер чиркәү эшләде, зур дини бәйрәмнәрдә халык шушында агылды. Оештыручыларга рәхмәт. Кеше рәхәтләнеп күңел ача, - диде иске Гришкин мәктәбе укытучысы Клавдия Мокеева.
Иң мөһим һәм кызыклы язмаларны Татмедиа Telegram-каналында укыгыз
Телефон АО «ТАТМЕДИА»: (843) 222 09 84