Менделеевские новости
  • Рус Тат
  • Терлекчеләр бәйгедә сыналды

    "Победа" хуҗалыгында үткән "Һөнәре буенча иң яхшы" бәйгесенә терлекчелек белгечләре җыелды. Традицион чара сыер савучыларның һәм технологларның һөнәри осталыкларын арттыру, тәҗрибә уртаклашу максатыннан район авыл хуҗалыгы идарәсе хезмәткәрләре ярдәмендә оештырыла. Һава торышы шартларын искә алып, ул быел Бөрешле мәктәбендә үткәрелде. Район хуҗалыкларының ун сыер савучысы теоретик белем дәрәҗәсен билгеләүдә, саву...

    "Победа" хуҗалыгында үткән "Һөнәре буенча иң яхшы" бәйгесенә терлекчелек белгечләре җыелды.

    Традицион чара сыер савучыларның һәм технологларның һөнәри осталыкларын арттыру, тәҗрибә уртаклашу максатыннан район авыл хуҗалыгы идарәсе хезмәткәрләре ярдәмендә оештырыла.
    Һава торышы шартларын искә алып, ул быел Бөрешле мәктәбендә үткәрелде. Район хуҗалыкларының ун сыер савучысы теоретик белем дәрәҗәсен билгеләүдә, саву аппаратын билгеле бер вакытта сүтеп-җыюда осталыкларын ачыкларга тиеш булды. Аларның тырышлыгына идарә хезмәткәрләреннән торган комиссия гадел бәя бирергә тырышты.
    Чараны "Чишмәкәй" балалар фольклор ансамбле чыгышы ачты (җитәкчесе А.Рябова).
    Ярышка әзерлекләрен белдереп тезелгән белгечләрне авыл хуҗалыгы идарәсе начальнигы Хәйдәр Һадиуллин район башлыгы исеменнән сәламләп, уңышлар теләде. Аның теләкләренә хуҗалык җитәкчесе Геннадий Козлов та кушылды һәм һөнәри осталыкларын сынарга җыелучыларга барлык шартлар да тудырылуы турында белдерде.
    Идарәнең терлекчелек бүлеге начальнигы Фәүзәт Мөфтиев бәйге тәртибе белән таныштырды һәм конкурс башлануы турында игълан итте. Сыер савучылар ярышның беренче этабында үз һөнәрләре буенча сорауларга җаваплар эзләделәр. Икенче биремдә катнашучылар саву аппаратын сүтеп-җыюда төгәллек, өлгерлек, тизлек, осталык күрсәттеләр. Ярыш йомгаклары буенча "Мөхәммәтгалиев" КФХ сыер савучысы Айрат Сәлимовка тиңнәр булмады. Терлекчелектә ун ел хезмәт куючы егет 55 сыердан тәүлегенә 900 килограммга якын сөт савып ала. Һөнәрне әнисе үрнәгендә сайлаган. Җиңүче район данын республика конкурсында яклаячак. "Золотая Нива" (Монаш) хуҗалыгыннан Нина Малыгина - икенче, "Победа"дан Михаил Чернов өченче урынга лаек булдылар.
    Көтүлекне яңарту һәм терлекләрдән үрчем алуда технологлар эшчәнлегенең өлеше зур. Ясалма орлыкландыру пунктына җыелган белгечләр конкурс вакытында яхшы нәтиҗә күрсәттеләр. 1983 елдан бирле шушы өлкәдә тырышучы "Золотая Нива" (Монаш) технологы Анна Байтугановага авыл хуҗалыгы министрлыгының Мактау грамотасы тапшырылды. Анна Николаевна моңа кадәр дә район һәм республика күләмендәге бәйгеләрдә иң яхшылар арасына кергән. Лаеклы ялда булуына карамастан, һаман да яраткан һөнәренә тугрылыклы. Күпьеллык фидакарь хезмәте өчен "Нигъмәтҗанов" КФХ технологы Миңниса Гайнетдинова Минзәлә нәселдәнлек предприятиесе генераль директоры бүләге белән билгеләнде. "Абалач" хуҗалыгыннан Мөслимә Черкеевага беренче урын бирелде, Алевтина Семеновых икенчелекне яулады. ("Кама" колхозы"), "Гыйләҗетдинов" КФХ технологы Татьяна Федоровага өченче урын насыйп булды.
    Авыл хуҗалыгы идарәсе начальнигы Х.Һадиуллин җиңүчеләрне уңышлары белән котлады, киләчәктә тагын да нәтиҗәлерәк эшләргә өндәде һәм Мактау грамоталары, акчалата премия тапшырды. Барлык катнашучыларга да азык-төлек пакеты өләшенде. "Победа" хуҗалыгы җитәкчесе Г.Козловка һәм авыл җирлеге башлыгы Л.Смирновага чараны оештыруга зур өлеш керткәннәре өчен бүләкләр бирелде.
    Авыл мәдәният йорты директоры Флүсә Соловьева һәм үзешчән Светлана Сабирова көн геройларына иң матур җырларын бүләк иттеләр.

    Нравится
    Поделиться:
    Реклама
    Комментарии (0)
    Осталось символов: