Төнлә Казан аэропортында самолет полосадан читкә чыгып киткән

Төнлә Казан аэропортында самолет полосадан читкә чыккан дип хәбәр итә «Татар-информ. Татар» ведомствоның матбугат хезмәтенә сылтама белән. Гадәттән тыш хәлне Идел буе транспорт прокуратурасы тикшергән.

Мәгълүматларга караганда, кичә төнге уникенче яртылар тирәсендә Самара — Казан рейсын ясаган самолет аэропортка төшкәч очыш полосасыннан читкә чыга. Бу вакытта һава транспорты эчендә 35 пассажир һәм 3 экипаж әгъзасы булган. Зыян күрүчеләр юк.

Урынга транспорт прокуроры вазифаларын башкаручы килгән.

«Транспорт прокуратурасы әлеге хәлнең барлык нечкәлекләрен тикшерәчәк, җаваплы затларның гамәлләренә бәя бирәчәк һәм гаепле кешеләргә карата тиешле чаралар күрәчәк», — дип ачыклык керттеләр күзәтү ведомствосының матбугат хезмәтендә.
Идел буе транспорт прокуратурасы фотосы