Татарстан «Экология» проекты буенча урманнарны саклауга 200 млн сум тотачак

Шул исәптән, 46,4 миллион сумы урман хуҗалыгы, янгын сүндерү техникасы һәм җиһазлар алуга билгеләнгән.

Акчалар 4,8 мең гектар мәйданда урманнарны торгызу эшләрен башкаруга, 11 тоннадан артык орлык әзерләүгә, 30 миллион данәдән артык агач үсентесе үстерүгә тотылачак. Узган елда федераль бюджеттан урманнарны саклауга 121 миллион сум бүленгән булган. 11 тонна төрле агач орлыклары һәм имән чикләвеге җыелган, 2,4 мең гектар мәйданда яңа урман утыртылган, яңа техника һәм җиһазлар сатып алынган.

«Татарстан Республикасында урманнарны саклау» төбәк проекты «Экология» илкүләм проекты һәм «Урманнарны саклау» федераль проекты кысаларында тормышка ашырыла. Аның максаты – урманнарны саклау һәм арттыру.