Менделеевскиның «беренчеләре» Алабуганың «Алабуга Политехында» булдылар

Кичә Менделеевск районы «Беренчеләр хәрәкәте» укучылары Бөтенроссия балалар һәм яшьләр хәрәкәте проекты кысаларында күрше Алабуга шәһәренә сәяхәт кылдылар. Хәрәкәттә катнашучыларга «Алабуга Политех» ка барырга, шулай ук меңьеллык шәһәрнең истәлекле урыннары белән якыннанрак танышырга мөмкинлек бирелде.

«Әлеге экскурсия укучыларның белем багажын баету һәм дөньяга карашын киңәйтү белән генә чикләнми, ә үз сәләтләрен һәм омтылышларын аңлауга да ярдәм итә. Бу рәвешле һөнәр сайлауда перспективалы планнарга нигез салырга мөмкин», — дип билгеләп үтте Менделеевск районы балалар һәм яшьләр гомумроссия иҗтимагый-дәүләт хәрәкәтенең җирле бүлеге җитәкчесе Гөлнара Гайфетдинова.

«Алабуга» МИЗ Россиянең алдынгы махсус икътисади зоналары белән бер рәттә тора. Анда илнең иң зур квалификацияле эшче кадрлар әзерләү үзәге Алабуга политех урнашкан. Анда 1,5 меңгә якын студент белем ала, ә аларны МИЗ предприятиеләренең гамәлдәге белгечләре өйрәтә.

«Уку йорты карамагында 10нан артык лаборатория бар. Аларда студентлар практикада эшли торган заманча җиһазлар урнаштырылган. Безгә боларның барысын үз күзләребез белән карарга мөмкинлек бирделәр һәм барысы ничек оештырылганын сөйләделәр, — дип уртаклаша укучылар. — Экскурсия бик ошады».

Фото-превью: "Беренчеләр хәрәкәте" архивыннан