Фестиваль дулкынында – гришкинлылар

Чара "Бигәш" һәм "Бигәшкәй" фольклор ансамбльләренең "Сугышка озату" композициясе белән башланды. Программада лирик җырлар, күңел кылларын тибрәтерлек шигырьләр, хореографик композицияләр дә булды. Һәр артистның чыгыш ясаучының хәрби, я милли киемдә чыгыш ясавы үзенчәлекле төсмер бирде. Виктор Япаев, Анжелика Комарова, Софья Камашева, Людмила Комарова, Артём Кузнецов башкарган композицияләрне тамашачы яратып кабул итте, аларга хәтта залдагылар кушылып җырлады. Хезмәт ветераны Анна Фәрхетдинованың (Илкә) вокаль осталыгын, Алия Молчанова укыган "Яшь ана" һәм Иван Алексеевның "Бөек Җиңү" исемле шигырьләрен менделеевлылар тиешенчә бәяләде.

Өлкәннәр һәм балалар фольклор ансамбле катнашында сугыштан кайту күренешен сәхнәләштерү, Левитанның 9 майда Җиңү көнен игълан иткән тавышын радиоязмадан тыңлау, экранда кинохроникадан теманы тасвирлаучы кадрлар алмашы безгә тыныч тормыш бүләк иткән ветераннарга рәхмәтле булу кирәклеге турында уйланырга мәҗбүр итте. "Республикада, районда яшәүче халыкларның дуслыгы сугышка киртә булсын иде", дигән сүзләр чараның лейтмотивы булды.

Йомгаклау өлешендә "Җиңү көне" исемле җыр яңгыравы астында үзешчән артистларның шарлар белән сәхнәгә чыгуы, фейерверк һәм тамашачының аларны аягүрә алкышлавы якты тәэсирләр калдырды.

- Концертны әзерләүгә өлкәннәр, мәктәп укучылары, авыл интеллигенциясе һәм яшьләр җәлеп ителде, - диде Иске Гришкин җирлеге башлыгы Валентина Мамакова.

Район җитәкчесе Валерий Чершинцев үзешчәннәргә фестиваль темасына иҗади якын килүләре, сәләтләрен күрсәтүләре өчен рәхмәт белдерде.

Концертны Виктор Япаев һәм Алия Молчанова алып барды.