Фестиваль эстафетасы: авылдан – шәһәргә

автор, 5 март 2013 - 18:45

1658

Ольга Смолькова Авыл коллективларының ХII халык иҗаты фестиваленең йомгаклау концертына 30дан артык номер керде. Сала артистлары концертка җирлекләр башлыклары, хуплау төркемнәре озатуында килделәр. - Мине "Памаш" коллективында катнашучы танышым чакырды, - ди Менделеевскида яшәүче Светлана Щербакова, - гомумән, мин үзем дә үзешчән сәнгатьне яратам, элек гармунда уйнап җырлый идем, хәзер...

Ольга Смолькова

Авыл коллективларының ХII халык иҗаты фестиваленең йомгаклау концертына 30дан артык номер керде.

Сала артистлары концертка җирлекләр башлыклары, хуплау төркемнәре озатуында килделәр.

- Мине "Памаш" коллективында катнашучы танышым чакырды, - ди Менделеевскида яшәүче Светлана Щербакова, - гомумән, мин үзем дә үзешчән сәнгатьне яратам, элек гармунда уйнап җырлый идем, хәзер тамашачы сыйфатында зур канәгатьләнү алам.

Фойеда алма төшәр урын да юк. Танылган "Элнет" коллективы җитәкчесе Геннадий Мальгин үз артистларына үгет-нәсыйхәтләрен бирә.

- Без беренче тапкыр яңа костюмнарда чыгыш ясыйбыз, - ди Камай мәдәният йорты директоры Сәрия Зиннурова, - коллективыбызны "Камай сандугачы" дип атадык һәм бүген татар җырларына попурри башкарабыз.

Жюри составына район башкарма комитеты җитәкчесе Павел Миронов, "Менделеевск" МҮ директоры Лариса Кривилева, Светлана Бакашева, хореограф Ләйсән Латыйпова, автоклуб мөдире Елена Дунаева керде.

Концертны ачу хокукы Турайдан сәхнә ветераны Ясәви Садыйковка бирелде. Номерларның күпчелеге игълан ителгән Экология елы темасына тәңгәл килде. Ижевка артистлары "Колобок" сәхнә күренешендә әйләнә-тирә мохитне саклау проблемасын күтәрделәр. "Бигәш", "Тихоновские зори", "Рождественские напевы", "Теремшур" һәм башка ансамбльләр туган якның матурлыгын тасвирлаучы җырлар һәм биюләр тәкъдим иттеләр.

Тамашачылар солистлар Марина Кошкина, Виктор Япаев, Флүсә Соловьева, Алена Данилова, Мария Ботникова, Людмила Морозова, Валентина Пономарева, Сәетҗан Мәҗитовны алкышлар белән каршыладылар. Бәзәкәлеләр көн кадагына куелган сәхнә күренеше белән әсир иттеләр.

Бу көнне "Юность" РМЙ сәхнәсендә рус, татар, мари, удмурт, таҗыйк көйләре яңгырады.

Район башлыгы Игорь Привалов үзешчән артистларның талантына соклануын белдерде.

- Барлык номерлар да ошады, - дип концерттан алган тәэсирләре белән бүлеште хезмәт ветераны Антонина Маштакова, - безгә шатлык бүләк иткәннәре өчен авыллыларга рәхмәт.

Хәзер "Безгә васыять - җиребезне саклау" ХII халык иҗаты фестивале эстафетасы шәһәрлеләрдә.

Рәис Сәхапов фотолары