Илнәт авылында "Перкан лийже" исемле мари ашлары регионара фестивале

Халыкара гаилә көне уңаеннан Илнәт авылының мәдәният йорты мәйданында "Перкан лийже" исемле мари ашлары регионара фестивале булды. Анда Әгерҗе, Грахов, Алнаш, Алабуга, Менделеевск районнары, Можга шәһәреннән вәкилләр катнашты.

Фестиваль программасы тирән эчтәлекле, бай һәм мавыктыргыч итеп әзерләнде. Алып баручы, район ЗАГС бүлеге мөдире Фаина Козырева авыл халкы һәм килгән кунаклар әзерләгән милли ризыклар турында сорашты. Коман мелна, пәрәмәч, кыстыбый һәм башка сый-нигъмәтләр белән өстәлләр сыгылып тора. Һәр делегация үзләренең камыр ашларын тәэмин итте.

Бәйрәм концерты "Эльнет" халык фольклор ансамбле чыгышы белән башлан ды.

Җирлек башлыгы Ростислав Иосифов илнәтлеләрне һәм килгән кунакларны район башлыгы исеменнән гаилә көне белән котлады, бердәм һәм ныклы гаилә - ил терәге булуын ассызыклады.

Халык фольклор ансамбльләре чыгышы, дәртле җыр-биюләр белән үрелеп барган концертның һәр номеры көчле алкышларга күмелде.

Бу көнне бәйрәмгә килүчеләр учакта пешкән балык шулпасы, кайнар чәй һәм төрле төбәкләрдә әзерләнгән милли ризыклардан авыз иттеләр. Язгы кояшлы ямьле көндә ямь-яшел чирәмле мәйданда олысы-кечесе күңел ачты.

- Халыкның борынгыдан килгән гореф-гадәтен, мәдәниятен саклау, үстерү һәм буынннан-буынга җиткерү, тирә-яктагы халыклар белән аралашу, тәҗрибә уртаклашу максатыннан җирлек территориясендә төрле чаралар оештырыла, әйтергә кирәк, һәркем актив катнаша, - дип белдерде "ТР марийлар милли-мәдәни автономиясе " региональ иҗтимагый оешмасының Менделеевск бүлеге җитәкчесе Геннадий Мальгин.