С. Гассар ис. мәдәният сараенда «Туган тел — халыкның җаны» XX район халык иҗаты фестиваленең гала-концерты булды

Артистлар өчен җан атарга зал тулы кеше җыелды. Бюджет оешмаларының, акционерлык җәмгыятьләренең, ТИСларның, район пенсионерларының сәнгать әһелләре искиткеч номерлар белән чыгыш ясадылар. Биюләр, җырлар, нәфис сүз катнашучыларның талантларын ачты. Залдагыларның алкышлары артистларга сәхнәдә үзләрен ышанычлы тоярга ярдәм итте.

Гала-концертта 50дән артык иҗат номеры тәкъдим ителде. Анда катнашучылар рус, татар, мари, удмурт телләрендә композицияләр белән һәркемнең күңеленә күтәренке кәеф өстәделәр, бәйрәм рухын тоярга ярдәм иттеләр. Ахырда лауреатларны бүләкләү тантанасы булды.

«Аммоний» АҖ (ир-атлар составы) хореографик коллективы Гран-прига лаек булды, 11 нче балалар бакчасы тәрбиячеләре — кече гран-прига.