Гореф-гадәтләр законнан көчлерәк

Чыганаклар

– Әни – Тукай, әти Кукмара районыннан. Алар Пермьдә танышканнар, – ди Можгада яшәүче Әлфия. – Милли традицияләрне хөрмәт итәм, чөнки бу үткән, бүгенге һәм киләчәк буыннарның элемтәсе. Сабантуйда катнашырга чакыргач, бик теләп риза булдым. Бу татар мохитендә булырга менә дигән мөмкинлек.

Ханымның өч баласы, оныклары бар. Кече кызы һәм оныгы “Кояш нурлары” ансамбленә йөриләр. Традицияләрне онытмыйлар.

– Җырлыйлар, бииләр, иң мөһиме – татар телендә сөйләшәләр, – дип билгели Әлфия. –Удмуртиядә яшәп үз тамырларыңны онытмау безнең өчен мөһим.

Милли колорит

Сабантуй – үзенчәлекле бәйрәм, еллар узса да, аның асылы үзгәрми, төп традицияләре саклана. Җырлар, биюләр, халык уеннары, милли көрәш – Можга бәйрәмендә болар барысы да булды.

Катнашучыларны район башлыгы Валерий Чершинцев, Можга башлыгы вазифасын башкаручы Мансур Насретдинов сәламләделәр. Валерий Сергеевич хуҗаларга түбәтәйләр тапшырды.

Бәйрәмне Менделеевскиның яшь артистлары хореографик композициясе башлады.

– Менә дигән пролог, – дип билгели Можгада яшәүче Альбина Сафина. – Шундый сәләтле балалар, болай оста бию өчен аларга хәрәкәтләрне күп мәртәбә кабатларга туры килгәндер. Чыгышларын каравы да күңелле. Татар халкы белән горурланам. Менделеевлыларга шундый бүләк әзерләүләре өчен рәхмәт.

Традицияләр

Стадионның бер ягында илебездә яшәүче төрле милләт халыкларының җырлары һәм биюләре җәелдерелсә, икенчесендә спорт уеннары башланды – билбау белән көрәш тамашачыны төп мәйданга җыйды.

– Әти-әниләр сөйләвенчә, элек-электән милли көрәштә иң көчлеләр катнашкан. Бу традиция саклана,– дип сөйли Адель Мифтахов.

Җиңүчеләрне төрле авырлык категорияләрендә билгеләделәр. Иң яхшыларга акчалата сертификатлар һәм бүләкләр тапшырылды, иң көчлеләргә – бәрәннәр. Безнең район тәкәсен Артём Алексеев алды.