Менделеевскида “Эрудит” интеллектуаль уеннар сериясе җиңүчеләрен бүләкләделәр.

Оештыручылар, БИҮ бүлекләре мөдирләре Юлия Комарова һәм Айгөл Моталипова билгеләвенчә, уеннар сериясен оештыруның төп максаты укучыларның интеллектуаль һәм иҗади мөмкинлекләрен үстерү һәм гамәлгә ашыру, шулай ук аларны илебезнең тарихын өйрәнүгә кызыксынуларын арттыру булды.

Уку елы барышында 26 интеллектуаль уен үткәрелде. Анда 84 укучы катнашты, алар өчен Россия тарихы буенча 780 гади булмаган сораулар әзерләнде. Дөрес җавап бирү һәм күбрәк баллар җыю өчен Россия тарихы чорын өйрәнергә кирәк булды. Мисал өчен, уенчылар рус князьләренең генеалогик элемтәләрен, аларның танылган әйтемнәрен, тарихи эзлеклелекне һәм вакыйгаларны, фактларны белүләрен дәлилләделәр. Ел дәвамында ветераннар Советы, туган якны өйрәнү музее, балалар китапханәсе, Л.Я.Карпов исемендәге химзавод һәм БИҮ вәкилләре жюри әгъзалары булдылар. Командаларны тугыз тарих укытучысы әзерләде.

Гади булмаган интеллектуаль ярышта лидерлар һәм Россия тарихын иң яхшы белүчеләр сафына 1, 2, 3, 7 нче мәктәпләр һәм гимназия командалары чыкты. Командаларның барлык уеннары йомгаклары буенча 2 һәм 3 нче урыннарны яулаучылар дипломнар, истәлекле медальләр һәм призлар белән бүләкләнделәр.

Кубокларны уенның бәхәссез җиңүчеләре – гимназиянең 6, 7, 8 нче сыйныфлары укучылары алды. Алар “Аммоний”дан Казанның “Россия – минем тарихым” тарихи паркына, интерактив музейга бару өчен сертификатлар белән бүләкләнделәр. 80нән артык укучы “Россия – минем тарихым” экспозициясен –борынгы вакытлардан алып хәзерге көнгә кадәрге безнең илебез тарихын карады.

– Ул 42 залда урнаштырылган хронологик тәртиптәге дүрт мультимедияле экспозициядән торды. Без илебез тарихын интерактив экраннар, сенсорлы өстәлләр һәм китаплар аша күрдек, – дип фикерләре белән уртаклаштылар катнашучылар.