Яшь юл инспекторларының "Куркынычсыз тәгәрмәч" район бәйгесе

Традиция буенча, 7 нче мәктәп базасында яшь юл инспекторларының "Куркынычсыз тәгәрмәч" район бәйгесе узды. Дәүләт автоинспекциясе службасының 80 еллыгына багышланган чараны район мәгариф идарәсе, ЮХИДИ бүлеге белән берлектә "ТР юл хәрәкәте куркынычсызлыгының фәнни һәм мәгариф программаларын финанслау дирекциясе" Дәүләт учреждениесенең Менделеевск филиалы оештырды.

Аның максаты: юлларда иминлек булдыру, юл-транспорт хәлләрен кисәтү, җәмәгать тәртибен тәэмин итү, сәламәт яшәү рәвешен пропагандалау.

Бәйгедә 20 шәһәр һәм авыллар гомуми белем бирү мәктәпләре командалары катнашты.

ТР һәм район гимннары яңгыраганнан соң, яшь юл инспекторларын, укытучыларны, килгән кунакларны Россия ЭЭМ ЮХИДИ бүлегенең Менделеевск районы буенча начальнигы вазифасын башкаручы Рәсим Мифтахов, район мәгариф Идарәсе начальнигы урынбасары Фидан Кәлимуллин сәламләп, лаеклы җиңүләр теләделәр.

Командалар "Юл йөрү кагыйдәләрен яхшы белүчеләр", "Беренчел медицина ярдәме күрсәтү", "Велосипедта фигуралы йөрү" станцияләрендә шәхси беренчелеккә сыналдылар. Шулай ук алар "Бергәләп юл хәрәкәте куркынычсызлыгы өчен" командалар иҗат конкурсында агитация-пропаганда чараларын тәкъдим иттеләр.

Ярышлар киеренке шартларда узды һәм, ниһаять, нәтиҗәләр билгеле булды.

Беренче урынны Лилия Гыйззәтуллина җитәкчелегендәге 4 нче мәктәп яшь инспекторлар отряды яулады. Икенче урынга - 7 нче мәктәп командасы (җитәкчесе Екатерина Воробьева), өченчегә - Турай (Рәмзия Зиннәтуллина) һәм Монаш (Виктор Николаев) отрядлары ия булдылар. Җиңүчеләрнең барысына да грамоталар, призлар, мәктәпләргә кыйммәтле бүләкләр тапшырылды.