“Бәхет кошы”н тоткан балалар

Балалар иҗат үзәгендә уздырылган "Матурлык дөньяны коткарыр" исемле чара күпсанлы балаларны һәм әти-әниләрне җыйды.
Декоратив-гамәли иҗат фестивалендә үзәк берләшмәләренә йөрүче балалар педагоглары белән берлектә фантазияләрен эшкә җигеп, кул астындагы материаллардан үз эшләрен тәкъдим иттеләр. Биредә бәйләнгән, тегелгән, чигелгән, сәйләннән ясалган әйберләрне хозур кылырга була иде.
Актлар залындагы рәтләрне гадәти булмаган киемдәге модельләр, чыгыш ясаучыларның истәлекле мизгелләрен фотога төшереп алырга ашыккан тамашачы биләгән.
Тихоноводан Софья һәм Диана Семёноваларның әниләре ярдәме белән әзерләгән костюмнары "Мәк аланы" һәм "Модалы кәеф" дип исемләнгән. Кәгазь, полиэтилен, йогурт савыты - барысы да эшкә җигелгән. Кызлар узган ел да бу фестивальдә призлы урынны яулаганнар.
Бәзәкә мәктәбеннән Лилия Таҗиеваның кул эшләре ("Оста куллар", Гөлнур Нуретдинова) тамашачы симпатиясе призына лаек булды. Турайдан Миләүшә Мостафинаның бәйләгән әйберләре "иң яхшы бәйләгән модель" номинациясендә җиңүче дип игълан ителде. "Имидж" берләшмәсе (җитәкчесе Эльмира Әхкыямова) шәкерте Эльвина Истиваеның күлмәге кулланудан чыккан материаллардан эшләнгән. Ул шундый исемле номинациядә беренче урынга чыкты. Вероника Латыйпова, "Дизайн" берләшмәсендә шөгыльләнүче кызлар һәм егетләр әзерләгән костюмнар коллекциясе "Иң яхшы коллекция" дип танылды. Вәсилә Мортазина җитәкчелегендәге "Модульле оригами" берләшмәсе шәкертләре сәхнәдә үз-үзен тотышлары өчен бүләкләнделәр. "Бәхет кошы" берләшмәсенә йөрүче Лилия Габдрахманованың шәкерте Регина Хаҗиева әзерләгән ак төстәге костюм оригинальлеге белән тамашачыны шаккаттырды һәм гран-прига ия булды.
Иҗат үзәгенең бүлек мөдире Татьяна Ясәвиева чыгыш ясаучыларга рәхмәт белдерде.
- Педагогларның иҗади эзләнүләре, әти-әниләрнең булышлыгы нәтиҗәсе бүгенге күргәзмәдә ачык чагыла. Һәр чыгыш үзенчәлекле һәм кабатланмас. Сезгә киләчәктә яңа иҗат уңышлары юлдаш булсын, - диде.

Мәдинә Григорьева

Вәсилә Мортазина фотолары