“Әбиемнең күңел сандыгы”

Һәр милләт үз җирлегендә барлыкка килгән һәм буыннан-буынга күчә торган гореф-гадәтләрен, кешеләрнең яшәү рәвешен, карашларын, зәвыкларын сакларга омтыла.
Йолаларыбыз, бәйрәмнәребез, үткән тарихыбыз милли хисләр формалаштыруда, милли горурлык тәрбияләүдә әһәмиятле урын тоталар. Президентыбыз Рөстәм Миңнеханов тарафыннан 2012 ел Татарстанда тарихи-мәдәни мирас елы дип игълан ителде. Шуңа күрә, республикакүләм "Мин татарча сөйләшәм" акциясен гимназиядә әлеге тема белән бәйләп уздырырга булдык.
Бу акциянең максаты - татар телен өйрәнүгә омтылышны арттыру, татар телендә аралашуга күбрәк кешене тарту, телгә, мәдәни мираска мәхәббәт һәм хөрмәт хисләре тәрбияләү.
Татар теле укытучылары Х.Муллагалиева һәм Р.Закирова буыннар чылбырын күрсәтү, күпьеллык тарихы булган шәһәрнең истәлекле урыннары белән таныштыру максатында сценарийны "Әбиемнең күңел сандыгы" дип атадылар. Катнашучылар районыбызның барлык оешмаларында булып, татар телендә аралашып, аның дәүләт теле буларак әһәмиятен күрсәтергә омтылдылар. Алар бу чарага сәүдә һәм халыкка хезмәт күрсәтү урыннарын җәлеп иттеләр, администрация, бассейн, балалар бакчасы, редакция, почта, шифаханә, даруханә, балалар иҗаты үзәге, сәнгать мәктәбе хезмәткәрләре белән әңгәмә кордылар, үзләрен кызыксындырган сорауларны бирделәр.
Оныклар да әбиләрен мәктәп тарихы, традициягә әверелгән кичәләр, бәйрәмнәр белән таныштырдылар. Чыннан да, гимназиядә үткәрелгән һәр дәрестә һәм дәрестән соң чараларда балаларга татар теленең матурлыгын, төгәллеген, байлыгын күрсәтергә тырышалар. Моны без "Нәүрүзбикә", "Татар малае-2012", "Озын толым", "Тамчы-шоу", укучылар белән укытучылар берлегендә үткәргән "Эрудит" бәйгеләрендә, "Кошлар - безнең дуслар", "Әбием - алтыным", "Һөнәрле үлмәс, һөнәрсез көн күрмәс", "Туган ягымның күренекле кешеләре", "Кызыклы грамматика", "Сәламәт тәндә - сәламәт акыл" исемле дәресләрдә күрдек.
Акциядә гимназия укучылары, аларның әти-әниләре, укытучылар, оешма хезмәткәрләре бик теләп катнаштылар һәм "Мин татарча сөйләшәм" логотиплары белән горурланып йөрделәр, очрашулар барышында 800дән артык кешене татарча сөйләштереп, ана телендә аралашуның мөһимлегенә инандырдылар.
Нәтиҗә ясап шуны әйтәсе килә: мирасның иң кадерлесе бербөтен халыкның җанына сеңеп кала, аның телендә, әдәбиятында, гореф-гадәтләрендә, буыннан-буынга күчеп килгән йолаларында, бәйрәмнәрендә саклана. Ул мирас тарих чылбыры булып үрелеп барсын иде.