Гран-при Ренас Шириевта

1 нче мәктәптә татар халкының бөек шагыйре Габдулла Тукайның - 131 һәм шәһәрнең 50 еллыгына багышланган "Шигъри Менделеевск" исемле традицион нәфис сүз осталары район бәйгесенең йомгаклау туры узды.

Сайлап алу турында гомуми белем мәктәпләреннән һәм мәктәпкәчә учреждениеләрдән барлыгы 71 бала катнашты, шуларның кырыгы финалга узды.
- Бүгенге бәйгегә алты укучы килде. Камилла Гайфуллина һәм Әдилә Шәяхмәтова Казанда Халыкара нәфис сүз осталары бәйгесендә чыгыш ясадылар. Сәнгатьле сөйләргә өйрәнү зур тырышлык, зиһенлелек таләп итә, - дип билгеләде 3 нче мәктәпнең татар теле мөгаллимәсе Энҗе Заһидуллина.
Агымдагы елда конкурсантлар җирле шагыйрьләр Марсель Гыймазетдинов, Фирдәвес Рәхмәтуллина, Иван Алексеев, Наилә Миннәхмәтова, Фазыл Шәех һәм башкаларның әсәрләренә өстенлек биргәннәр, шулай ук авторлык һәм күренекле әдипләр Габдулла Тукай, Фәнис Яруллин, Роберт Миңнуллин һ.б. шигырьләрен сайлаганнар. Мәгариф идарәсе методисты, жюри рәисе Эльмира Гыйльфанова катнашучыларга, призерларга, аларның остазларына рәхмәт белдерде, татар шигъриятен ана телен камил белгәннәр белән берәттән рус телле балалар, башка милләт вәкилләре дә теләп өйрәнүләрен билгеләде. Ул бәйгедә катнашучыларга шаһәдәтнамәләр, җиңүчеләргә дипломнар, бүләкләр тапшырды.
Үз яшь категорияләрендә татар төркемнәре арасында беренче урынга Динар Шәихов (Абалач), Гөлия Таҗиева (1 нче гимназия), Әдилә Шәяхмәтова (1 нче мәктәп) лаек булдылар, рус төркемнәре арасында 1 нче мәктәптән Яна Шалаумова, Елизавета Грудцова һәм Наталья Гыймадиева иң яхшылар дип табылдылар. Мәктәпкәчә учреждениеләр шәкертләре арасында да җиңүчеләр билгеләнде. Гран-прины тулы хокук белән Песәйдән Ренас Шириев отты.