Идел буйлап сәяхәт – депутаттан бүләк

Ура! Безгә - 70 укучыга теплоходта "Казан-Самара-Болгар-Казан" круизында булу бәхете тәтеде! Без - шәһәр һәм авыл мәктәпләренең олимпиада, конкурсларда җиңүчеләре, балалар берләшмәләре активистлары, күпбалалы һәм азкеремле гаиләләрдән.
Круизда безне БИҮ директоры Ә.Талыйпова озата барды, район советы аппараты җитәкчесе Илшат Кәшипов, мәгариф идарәсе начальнигы Сергей Данилов оештыру мәсьәләләрен хәл итүдә булышлык күрсәттеләр.
Казан елга портында безне ап-ак палубалы күренекле "Борис Полевой" теплоходы уңайлыклы каюталары, киң күңелле персоналы белән каршы алды, ресторанда тукландык - барысы да супер булды!
Круизның программасы кызыклы һәм мавыктыргыч чараларга бай иде: бию буенча мастер-класс, "Даёшь, молодёжь" шоу-программасы, караоке-клуб, шахмат-шашка турниры, капитан рубкасына һәм теплоходның йөрәге - мотор бүлегенә экскурсия, палубада кичке дискотека. Иң мөһиме - икенче көнне без Самара шәһәрендә экскурсиядә булдык һәм Куйбышев, Чапаев, Дан мәйданнарын күрдек. Мәңгелек ут янында Ватанны саклаганда һәлак булганнарны бер минутлык тынлык белән искә алдык. Данлыклы Сталин бункерын дулкынлану белән карадык, экскурсия барышында без илебезне җиңү мөмкин түгеллеген аңладык, без - көчле рухлы халык. Экскурсия үткәрүче безнең гражданлык һәм патриотик позициябез белән тәэсирләнде.
Самарадагы җиһазланган пляж, чиста комы, балалар аттракционнары һәм ял итү өчен павильоннары булган биш километрлы яр буе гаҗәпләндерде. Без көнләштек һәм үзебезнең Кама буенда да шундый пляж булуын теләдек.
Өченче көнне теплоход борынгы Болгар ярларында тукталды, анда безнең делегацияне ипи-тоз белән каршы алдылар, Милли музей белән таныштырдылар. Барлык экскурсияләрдән туганнарыбызга һәм якыннарыбызга сувенирлар алып кайттык.
Теплоходта булганда без иксез-чиксез елга киңлекләре белән сокландык, сусаклагычлар һәм шлюзлар аша үттек. Жигулёвск тауларын, Тархан имәнлеген, Кама елгасының Иделгә кою урынын күрдек.
Безгә мондый бүләк - истәлекле круиз оештырганы өчен алтын йөрәкле кеше, балаларны яратучы һәм аңлаучы депутатыбыз Р.Ханбиковка ихлас күңелдән рәхмәт белдерәбез.
Балалар иҗат үзәгенең "Лидер" берләшмәсе активы