Җиңүгә юл җиңелүләр аша килә

"Химик" ССК шәкерте Максим Кузнецов кобудо көнчыгыш хәрби бермә-бер көрәше буенча Россия кубогына ярышларда үз яшь категориясендә беренче урын алды, 18-20 яшь һәм 21 яшьтән өлкәнрәкләр арасында кара билбауга ия булды. Үсмер Россия Федерациясе Спорт, туризм һәм яшьләр сәясәте министрлыгының беренче дәрәҗә дипломы белән бүләкләнде.
Максим сүзләренчә, каратэ белән ул алты яшьтән шөгыльләнә башлаган. Дусларының әти-әниләре аны Тихоноводан спорт сараена күнекмәләр алырга атнага берничә мәртәбә алып киләләр. Беренче тренеры Андрей тарасов җитәкчелегендә көнчгыш хәрби сәнгате нигезләренә төшенә, аннан тренеры Сергей Лисютин кул астында күнекмәләрен камилләштерә.
- Каратэ һәм кобудо организмны гына чыныктырып калмый, рухның көчен арттыра, - дип саный яшүсмер - Әлбәттә, спорт белән шөгыльләнү күп вакытны ала, бу - даими күнекмәләр, ярышлар, "Яшь мастер" лагерында сменада булу, әмма мин үземне алардан башка күз алдына китерә алмыйм. Җәрәхәтләнүләр дә була, алардан башка мөмкин түгел, әмма кобудоның баш киеме конструкциясе һәм башка куркынычсызлык чаралары нәтиҗәсендә җәрәхәт алу кими, - дип сөйли Максим.
Спортчының копилкасында бүләкләре бихисап. Соңгы елларда каратэ, кобудо һәм кул сугышы белән тырышып шөгыльләнү нәтиҗәсендә төрле дәрәҗә медальләрен ул инде килограммлап саный. Ярышлар вакытында Максимны хупларга әти-әнисе, энекәше Денис һәм яраткан кызы Анжела килә.
- Даими күнекмәләр, яхшы дисциплина, көчле рухлы булуы Максимга югары нәтиҗәләргә ирешү мөмкинлеге бирә. Күптән түгел генә ул спорт мастерына кандидат нормативын үтәде, мастер исеме рәсмиләштерелә, - ди тренеры Сергей Лисютин.
Хәзер Максим - Кама дәүләт автомеханика техникумы студенты, электрчы һөнәрен үзләштерә. Киләчәктә Идел буе дәүләт физик культура, спорт һәм туризм академиясенә укырга керергә тели. Бу спортчыга тренерлык эшчәнлеген үзләштерүгә комачауламый.
- Ә гомумән, җиңелә дә белергә өйрәнергә кирәк, - дип саный спортчы. - 13 ел дәвамында мин җиңүгә юлның җиңелүләр аша булуын аңладым.

Венера Әмирова