Мәктәпкә – яңа сулыш

Мәктәпнең төп бинасын узган елда яңадан торгызу эшләре башланды. Директор Ф.Яковлева белдерүенчә, яшь буынга белем һәм тәрбия бирүдә уңай шартлар булдыру максатыннан эчке һәм тышкы якларына капиталь ремонт үткәрү каралган.

Бинаның төп өлешен ремонтлауга республика бюджетыннан средстволар бүлеп бирелә.

2011 елның җәй айларында подряд оешмалары ярдәмендә түбә ремонтланды, бинаның алгы өлеше яңартылды һәм идәнгә ленолиум җәелде.

Агымдагы елның языннан ремонт эшләрен Ю.Готин җитәкчелегендәге "Резидә" ҖЧҖнең төзелеш бригадасы дәвам итә. Бу максатларга 11 миллион сумга якын акча үзләштереләчәк. Барлыгы 36 кеше иртәнге җидедән 16.00 сәгатькә кадәр җиң сызганып эшли.

- Бүгенге көндә планда каралганның 60 %ы үтәлгән. Бинаның төп өлешендә фундамент ныгытыла, яңгыр суын үткәргечләр яңартылды, пластик тәрәзәләр куелды. Контрактта каралмаса да, физик мөмкинлекләре чикле кешеләр өчен пандус булдырыла, бу эш әлегә 30%ка үтәлгән, - дип белдерде «Резидә» җәмгыятенең производство буенча начальник урынбасары Виталий Курдасов.

- Сафтан чыккан җылылык торбаларын кисеп урамга чыгардык, яңа корыч торбалар куелачак, аларны ак буяу белән буядылар. Бүгенге көндә кайнар һәм салкын су белән тәэмин итү челтәрен алыштыру бара. Тәҗрибәле белгечләр ярдәмендә бу эшне тиз көннәрдә төгәлләү планлаштырыла, - ди монтажчылар бригадиры Хәниф Нәҗметдинов.

Штукатур-буяучылар Любовь Нурмөхәммәтова һәм Валентина Иванова ишегалдына чыга торган ишек яны мәйданчыгын бизәү белән мәшгуль.

- Буяулар, пумалалар һ.б. кирәк-яраклар җитәрлек, бездән тырышлык һәм сыйфатлы эш сорала, - диләр алар бертавыштан.

- Бүгенге көндә подвалда канализация торбалары яңартылды, санузелларны демонтажлау эшләре башланды, сыйныф бүлмәләренең ишекләре алыштырылачак, - ди Фәнүзә Гайфетдиновна. - Ремонтка укытучылар, ата-аналар, техник персонал җәлеп ителгән. Классларны ата-аналар ремонтлаячак, шулай ук грантка ия мөгаллимнәр дә яңа уку елына сыйныф бүлмәләрен тәртипкә китерәчәк. Укучылар мәктәп мәйданчыгында үләннәрне чабалар. 15 августта узачак укытучылар конференциясенә мәктәпне куллануга тапшыру күздә тотыла.

Ремонт барышы район җитәкчесе И.Приваловның даими контролендә, капиталь төзелеш идарәсе хезмәткәрләре эшнең сыйфатын тикшерә, ата-аналар үз фикерләрен белдерәләр.

Күмәк эш тау күчерә, диләр. Ремонт билгеләнгән вакытка төгәлләнсә, укучылар 1 сентябрьдә төзекләндерелгән мәктәпкә укырга барачаклар.