Сингапурча укуны уңышлы кулланалар

Бу максаттан һәр районда база укыту учреждениеләре сайланды. Аларның саны иллегә җитә. Бездә бу вазифаны шәһәрнең өченче мәктәбе үти. Республикада укыту биш юнәлештә алып барыла. Менделеевск уку учреждениеләрендә "Критик фикерләүне үстерү" темасы нигезгә алынды. Өченче мәктәп педагоглары Олеся Миронова (тарих укытучысы), Римма Сөнгәтова (филолог) Казанда семинарларда укулар узганнар һәм өйрәтү буенча консультацияләр үткәрәләр. Программа кысаларында база мәктәбенең инглиз теле мөгаллиме Мария Петрова тәрҗемәче курсларында әзерлек узган. Ул - Сингапур вәкилләре белән аралашуда беренче ярдәмче.

Директор Евгений Ямщиков, Татарстан делегациясе составында Сингапурда булып, методика куллануны өйрәнеп кайтты. Агымдагы елның октябрендә Сингапур компаниясе вәкиле, һөнәргә өйрәтү буенча белгеч Ромеш җитәкчелегендә "Фикерләү мөмкинлеген үстерү этәргечләре" темасы буенча ике көнлек курслар оештырылган.

Шушы көннәрдә консультант Маха Сивалингам катнашында методик берләшмә үткәрелде. Чара планына Сингапур укуы буенча җаваплылар, яшь педагоглар өчен укулар, ачык дәресләр, мәктәп администрациясе, коллектив белән очрашулар кертелгән.

Без 2 нче сыйныфта ачык дәрестә булып, укытучы Зөлфия Шәймәрдәнованың методиканы практикада гамәлгә ашыруын күзәттек. Зөлфия Солтановна, команда формасында эшләүгә нигезләнеп, укучыларга уңай мохит тудыра алды. Шәкертләр индивидуаль, парлап һәм коллектив белән биремнәр үтәүдә активлык күрсәттеләр. Дәрес барышында күп төрле ысуллар куллану сыйфатлы белем алуга этәргеч булды.

Анализ өлешендә белгеч Маха Сивалингам, уку-укыту һәм тәрбия бирү буенча директор урынбасарлары Дмитрий Пехов, Людмила Городничева, мөгаллим Олеся Миронова ачык дәреснең методик яктан дөрес төзелүен, теманы ачуда кулланган алымнарның балаларга белем туплауга юнәлдерүен һәм системаның уңай нәтиҗәләр бирүен билгеләп үттеләр.

Агымдагы уку елында мондый очрашулар тәҗрибә уртаклашуга, белемнәрне ныгытуга юнәлдереләчәк.