Туган телем – татар теле

Шәһәрнең 2 нче балалар бакчасында (җитәкчесе Галина Легошина) татар мәдәнияте атналыгы узды.
Тәрбияче, татар теле мөгаллиме Рәзилә Хәсәнова, методист Алсу Шахвердян һәм төркем педагоглары чаралар уздырдылар. Балалар шөгыльләрдә, әңгәмәләрдә татар халкының мәдәнияте, гореф-гадәте, тормышы белән таныштылар. Фотолар, рәсемнәр белән баетылган киң мәгълүматлы "Дан сиңа, Татарстан!" дип исемләнгән альбом төзүгә педколлектив зур көч куйды. Татар халкының декоратив-кулланма сәнгате белән холлга урнаштырылган күргәзмә буенча танышып була иде.
Атнаның бер көнен халык ашларына багышлау кечкенәләргә иң тәмле ризыклар белән сыйлану мөмкинлеге бирде. Бакчага йөрүче башка милләт балаларының әниләре әзерләгән ризыкларга презентация ясау бәйрәмгә әверелде.
Өлкән төркемгә йөрүчеләр үз куллары белән эшләгән милли төсмерле сувенирларын иң кечкенәләргә бүләк иттеләр.
Атналык эшендә ата-аналар да актив катнашты: "Милли гаиләм" коллажы - алар тырышлыгы нәтиҗәсе. Чаралар чылбыры "Әниләр көненә" бәйрәме белән тәмамланды. Аны уздыруда көч куйган Рәзилә Хәсәнова, музыка җитәкчесе Ирина Будник, тәрбиячеләр кунакка чакырылган әни-әбиләрдән рәхмәт сүзләре кабул иттеләр. Балалар ул көнне иң кадерле кешеләрен җыр-бию, шигырьләр белән бүләкләделәр.
Татар мәдәнияте атналыгы фотокүргәзмәдә чагылачак.

фәймә Вахриева