Уңышның нигезе – энергияле команда һәм балаларның теләге

Һәр ел саен Менделеевск каратистлары бер атна Ык Тамагында "Яшь мастер" палаткалы лагерында ял итәләр.
Смена ачылуда башкарма комитет җитәкчесе урынбасары Павел Миронов, яшьләр бүлеге начальнигы Александр Макаров, Гигиена һәм эпидемиология бүлеге мөдире Валерий Якимов булдылар.
- Район башлыгы исеменнән сезне чираттагы сезон ачылу белән котлыйм, - дип балаларга мөрәҗәгать итте Павел Степанович. - Табигатьтә ял итү һәм шөгыльләнү мөмкинлеге булу шәп!
Флагны күтәрү хокукы яшьләр бүлеге начальнигы Александр Макаровка һәм ярышларда күптапкырлар җиңүче Дмитрий Егоровка бирелде.
Сменаны ачу каратистларның күрсәтмә чыгышлары белән дәвам итте. Ак кимонолы балалар кояшлы аланда кумитэ һәм корал белән ката алымнарын күрсәттеләр. Сюрпризлар да булды. Концерт программасына шаян сәхнә күренешләре, гимнастика номерлары һәм гитарага җырлар кергән иде. Очрашуны лагерь буйлап экскурсия, балалар белән аралашу һәм учакта әзерләнгән хуш исле борщтан авыз итү белән тәмамлады.

Вәсилә Мортазина

Автор фотосы

Палаткалы лагерьда ничек ял итәсез?

Дмитрий Байтуганов:
- Лагерьда бер гаилә кебек дус яшибез. Бер-беребезгә, кечкенәләргә булышабыз. Биредә күңелле, дусларыбыз күп. Футбол, волейбол уйныйбыз. Пешекчебез Раилә апа тәмле ашлар әзерли.
Регина Журина:
- Миңа палаткада яшәү, саф һавада ашау, учак исе ошый. Көннәребез уеннар, шөгыльләр белән үтә. Кичләрен учак янына җыелабыз, гитарага җырлар башкарабыз.
Влад Шамшурин:
- Палаткалы лагерьда яшәве искиткеч! Көнгә ике тапкыр шөгыльләр була, тагын бик күп кызыклы уеннар һәм бәйгеләр.
Рафаил Хәсәнов:
- Мин барысыннан да канәгать, киләсе елга да һичшиксез киләчәкмен.
Дмитрий Пехов, тәрбияче:
- Бу лагерь мин эшләргә туры килгән стационар лагерьлардан аерыла. Ул юкка гына "Яшь мастер" дип аталмый: биредә спорт рухы, дисциплина, үзара ярдәмләшү хөкем сөрә. Спортны һәм тәрбия эшләрен берләштерү - балалар өчен иң кулай ял.
Лилия Богатова, лагерь начальнигы, "Сатори" клубы директоры:
- Быел безнең лагерьда 26 бала ял итә. Спортчылардан тыш, уңышсыз, тулы булмаган гаиләләрдән балалар, ятимнәр бар. Тренерлар һәм тәрбиячеләр Мария Карманова, Анастасия Елизарова, Дмитрий Пехов - яшьләр һәм креативлар. Пешекче Раилә Матющенко, аның ярдәмчесе Лариса Павлова, медхезмәткәр Ирина Вахонина, каравылчы Константин Карманов вазифаларын намуслы башкаралар. Минем фикеремчә, лагерьны уңышлы үткәрүнең сере - хезмәткәрләрнең энергияле командасы һәм балаларның теләге.