Ана сертификаты – гаилә иминлеге нигезе

Менделеевскиның дүрт гаиләсенә тантаналы төстә нәниләре туу турында таныклык һәм ана сертификатлары тапшырылды.
Ата-аналар белән бергә бу вакыйга шатлыгын туганнары һәм коллегалары да уртаклашты. «Кама таңнары» приюты директоры Илсөяр Зыятдинова купшы чәчәк бәйләме белән килгән.
- Чәчәкләр безнең тәрбияче Светлана Филипповага, - ди Илсөяр Азатовна, - 18 февральдә аларның гаиләсендә икенче кызлары Екатерина туды. Без яшь гаиләгә балалар тәрбияләүдә энергия һәм көч теләргә килдек, йортлары балаларның шат авазларыннан яңгырап торсын.
- Екатерина исемен еш кушалар, - дип билгели ЗАГС бүлеге мөдире Фаина Козырева, Филипповларга бала туу турында таныклык тапшырып.
Ул яңа туган балаларның исемнәренең мәгънәсе белән таныштырды, нәниләргә һәм әти-әниләренә бәхет һәм иминлек теләде.
Елена Малявкина 22 көн элек кенә икенче тапкыр әни булган. Хәзер өлкән улы Ярославның энесе Дмитрий бар.
Ольга һәм Алексей Машковлар 1 апрельне Көлке көне генә итеп түгел, гаилә шатлыгы көне дә итеп билгеләячәкләр. Аларның 1 апрельдә кечкенә Викторияләре дөньяга килгән.
- Гаиләне дәүләт яклавы программасы 2007 елдан тормышка ашырыла. Ана сертификаты гаилә иминлеге нигезе булсын, - диде Пенсия фонды Идарәсе начальнигы Раушан Иштанова.
Кызы Наталья Уфимцеваның яңа туган оныгы Леонид белән котлаулар кабул итүен күреп, элеккеге Карпов исемендәге химия заводы хезмәткәре, биш бала әнисе Тамара Васильевна Заболотнова яшереп кенә күз яшьләрен сөртә.
- Кызым һәм аның гаиләсе өчен бик шатланам, - ди ул.
Ана капиталы алу перспективасы гаиләне планлаштырганда хәлиткеч булдымы дигән сорауга Наталья Уфимцева көлеп "Юк" дип җавап бирә.
Светлана Филиппова сүзләренчә, алар әле ана капиталы средстволарын нәрсәгә тоту турында төпле карарга килмәгәннәр, вариант буларак торак шартларын яхшырту карала.
Район башлыгы урынбасары Рөстәм Хәбибуллин, «Бердәм Россия» партиясенең җирле бүлекчәсе башкарма комитеты җитәкчесе Клавдия Смирнова, балаларын назлап күкрәкләренә кыскан яшь әниләрнең коллегалары тантана хуҗаларына иң ихлас котлау сүзләре адресладылар.
Ольга Смолькова

Рәис Сәхапов фотолары