Менделеевск яңалыклары

Менделеевск районы

18+
Рус Тат
2024 - год Семьи
Җәмгыять

Балаларга мәхәббәт белән

Күптән түгел календарьда яңа бәйрәм - Тәрбиячеләр һәм барлык мәктәпкәчә мәгариф хезмәткәрләре көне барлыкка килде. Хезмәт ветераны Луиза Хәсәнова балалар учреждениесендә эшләүгә 38 ел гомерен багышлаган. - 3 нче балалар бакчасы шәкертләре миңа әлегә кадәр очраганда: "Луиза Әхмәтовна, сез мине хәтерлисезме?" - дип сорыйлар, - дип сөйли Л.Хәсәнова. - Ничек...

Күптән түгел календарьда яңа бәйрәм - Тәрбиячеләр һәм барлык мәктәпкәчә мәгариф хезмәткәрләре көне барлыкка килде. Хезмәт ветераны Луиза Хәсәнова балалар учреждениесендә эшләүгә 38 ел гомерен багышлаган.

- 3 нче балалар бакчасы шәкертләре миңа әлегә кадәр очраганда: "Луиза Әхмәтовна, сез мине хәтерлисезме?" - дип сорыйлар, - дип сөйли Л.Хәсәнова. - Ничек хәтерләмәскә...
Аның шәкертләренә хәзер 50 һәм аннан да күбрәк яшь. Ләкин алар шаян, шук сабыйлар булып әле дә хәтерендә сакланалар.
- Женя шулкадәр шук малай иде. Ә Камил көндез йокларга яратмады. Наил начар ашый иде, пешекчеләр аның өчен аерым ризык та әзерлиләр иде, - дип күзләрендә очкын уйнатып сөйли ул.
Луиза Әхмәтовна Бондюгта зур тату гаиләдә туган. Сугыш башланган көнне бүгенгедәй хәтерли - аларның класслы уйнаган чагы була... Сынау еллары башлана - балалар ярдәмче хуҗалыкта эшлиләр, ипигә чират торалар, черек бәрәңге кәлҗемәсе ашыйлар. Ә Җиңү көне никадәр шатлыклы була!
Луизаның хезмәт биографиясе Карпов исемендәге химия заводында фасовкалаучы булып башлана. Аннан Елизавета Александровна Катаева җитәкчелек иткән 3 нче бакчага няня булып килә.
- Бик катгый, таләпчән иде, теләсә кемне эшкә алмады. Мөдир шундый булырга тиештер дә, - дип билгеләп үтә Луиза апа, - шуның өчен безнең балалар бакчасы иң яхшысы иде.
Бу аның гына фикере түгел. Күпме чыгарылыш баласы, шул исәптән бу юллар авторы да, хәзерге 1 нче гимназиянең коймасы аша караганда бакчага йөргән вакытларын еш искә алалар: "Менә монда кайчандыр җәйге верандалар тора иде, ә биредә безнең участок булды". Луиза Әхмәтовна кебек хезмәткәрләр, тәрбиячеләр тырышлыгы нәтиҗәсендә безнең балачак якты һәм риясыз узды.
- Эш күп булды, - дип сөйли Л.Хәсәнова. - Кер юу да нянялар вазифасына керде, хәтерлисезме, төркемнәрдә нинди ап-ак ашъяулыклар иде...
Луиза апа 1990 елдан лаеклы ялда. Иртә вафат булган ире белән өч бала тәрбияләп үстергәннәр. Авыр минутларда ул туганнарына, күршеләренә, якыннарына таяна. Луиза Әхмәтовна үзе дә "Изгелек кыл!" дигән принцип буенча яшәде һәм яши. Шунлыктан балалары, оныклары һәм оныкчыклары гына түгел, күпсанлы туганнары да аңа тартыла, барысының да фотографияләрен альбомда кадерләп саклый ул. Анда коллегалары, дистә еллар буена йөрәк җылысын биргән балалар турында якты истәлек буларак төрле еллар чыгарылышлары фотолары да бар.

Следите за самым важным и интересным в Telegram-каналеТатмедиа


Оставляйте реакции

0

0

0

0

0

К сожалению, реакцию можно поставить не более одного раза :(
Мы работаем над улучшением нашего сервиса

Нет комментариев

Теги: Менделеевск Менделеевск яналыклары Луиза Хасанова