Без – коткаручылар
86 нчы янгыннан сак бүлеге хезмәткәрләре төрле дәрәҗәдәге гадәттән тыш хәлләрдә дә сыйфатлы ярдәм күрсәтергә әзер. Алар 27 декабрьдә һөнәри бәйрәмнәрен - Коткаручылар көнен билгеләп үттеләр. Бу дата уңаеннан без бүлек начальнигы Александр Балясов белән әңгәмә кордык. - Безнең районда өч янгын сүндерү часте бар. Гадәттән тыш хәлләрдә алар күмәк...
86 нчы янгыннан сак бүлеге хезмәткәрләре төрле дәрәҗәдәге гадәттән тыш хәлләрдә дә сыйфатлы ярдәм күрсәтергә әзер. Алар 27 декабрьдә һөнәри бәйрәмнәрен - Коткаручылар көнен билгеләп үттеләр.
Бу дата уңаеннан без бүлек начальнигы Александр Балясов белән әңгәмә кордык.
- Безнең районда өч янгын сүндерү часте бар. Гадәттән тыш хәлләрдә алар күмәк көчкә берләшәләр. Кирәк булганда без башка районнардагы, күрше республикалардагы коллегаларыбызга да булышабыз. Мисал өчен, Удмуртиядә хәрби кораллар складында шартлау булганда безнең дә ярдәм таләп ителде, - ди Александр Юрьевич. - Кайда һәм нинди масштабта гадәттән тыш хәл буласын алдан юрап булмый, шуңа күрә без һәрвакыт - тәүлекнең 24 сәгатендә әзер.
Тупланган тәҗрибә коткаручыларның эшчәнлегендә зур роль уйный. Мисалга, бәйрәм көннәрендә һәм көчле салкыннарда гадәти булмаган хәлләр туу куркынычы зур.
- Нигездә тискәре күренешләрнең күбесе кеше гаебе белән килеп чыга. Еш кына менделеевлылар безне юкка гына чакырталар: мәсәлән, песи агачтан төшә алмаганда да... Дөрес, хайван да кызганыч, ләкин менә шул мизгелдә башка урында янгын чыгып, безнең ярдәм анда урынлырактыр, - ди А.Балясов.
Әңгәмәдәшебез сөйләвенчә, хәзер бердәм диспетчерлык службасын булдыру проекты эшләнә, озакламый 112 номерына шалтыратып ярдәм сорарга мөмкин булачак. Диспетчер, хәбәрне кабул итеп, тиешле службаларга тапшыра. Барлык телефон номерлары да теркәлә.
Александр Юрьевич кеше тормышын саклау өчен билгеләнгән җиһазлар белән таныштыра. Мисал өчен, юл-транспорт һәлакәте очракларында гидравлик авария-коткару инструментларыннан башка булмый. Зур кайчыга ошаган прибор зыян күргән автомобильдән җәрәхәтләнгән кешене чыгару, кирәк булганда ишекләрне ачу мөмкинлеге бирә.
- Юл-транспорт һәлакәтләрендә урынга барып ярдәм күрсәтү шулай ук безнең вазифага керә, - дип аңлата А.Балясов.
Бензин белән кискеч янгын булганда фатир яки гараж ишекләрен, тәрәзәләрне ачу өчен кирәк. Янгын сүндергәндә су күп таләп ителә, аны ул кадәр күләмдә йөртеп булмый, бу очракта насос ярдәмгә килә. Янгын машинасы, сулык янына килеп, насос кулланып берничә минутта су җыя.
- Безнең егетләр яхшы физик формада, даими күнегүләр алабыз. Шунсыз мөмкин дә түгел, чөнки без - коткаручылар, бурычыбыз - ярдәм күрсәтү, коткару, кеше тормышын саклап калу, аңа яшәү мөмкинлеге бирү, - дип әңгәмәне тәмамлый Александр Балясов.
Г.Гыйләҗетдинова
Телефон АО «ТАТМЕДИА»: (843) 222 09 84