Бөркетләр нәселеннән
Шушы көннәрдә сугыш һәм хезмәт ветераны, хөрмәткә лаек шәһәрдәшебез Николай Дмитриевич Ксенофонтов 85 яшьлек юбилеен билгеләп үтте. Шәһәр һәм район башлыгы Игорь Привалов исеменнән аның урынбасары Рөстәм Хәбибуллин юбилярга изге теләкләрен җиткерде, бүләкләр һәм РФ Президенты В.Путиннан котлау адресы тапшырды. Район ветераннар советы рәисе Любовь Сорокина, Карпов исемендәге химия заводы...
Шушы көннәрдә сугыш һәм хезмәт ветераны, хөрмәткә лаек шәһәрдәшебез Николай Дмитриевич Ксенофонтов 85 яшьлек юбилеен билгеләп үтте.
Шәһәр һәм район башлыгы Игорь Привалов исеменнән аның урынбасары Рөстәм Хәбибуллин юбилярга изге теләкләрен җиткерде, бүләкләр һәм РФ Президенты В.Путиннан котлау адресы тапшырды. Район ветераннар советы рәисе Любовь Сорокина, Карпов исемендәге химия заводы профсоюз комитеты рәисе урынбасары Татьяна Митшина, гипосульфит цехы комитеты рәисе Оксана Зәкиева һәм заводның ветераннар советы рәисе Роза Галиева, хәрби комиссариат начальнигы исеменнән Надежда Борихина тантана хуҗасына котлаулар җиткерделәр.
Сугыш Ык Тамагында яшәгән Ксенофонтовлар гаиләсенә күтәрә алмаслык кайгы китергән. Хатыны Прасковьяны, дүрт баласын ятим итеп, 36 яшендә әтиләре һәм тормышка беренче адымнарын гына ясаган 17 яшьлек уллары Анатолий сугыш кырында ятып калалар. Бишенче сыйныфка кадәр генә белем алу мөмкинлеге булган Николайга бик иртә гаилә башлыгы йөгәнен тартырга туры килә. Хуҗалык мәшәкатьләре дә шул ныгып җитмәгән үсмерләр җилкәсенә төшә.
1944 елда аңа да фронтка китәргә чират җитә. Ерак Көнчыгышта Хәрби-диңгез флотында, соңрак Япония сугышында катнашкан ветеранның батырлыклары икенче дәрәҗә Бөек Ватан сугышы ордены, Жуков медале белән билгеләнгән. Николай Дмитриевич 1951 елда гына туган як җиренә аяк баса. Ул чорда эш табу җиңел булмый, алай да яшь солдат Карпов исемендәге химия заводының гипосульфит цехына урнаша. Утыз елга якын бер урында хезмәт кую дәверендә мактаулылар исемлегендә була. Юбилярның эш стажы биш дистә елга җыела. Коллективта хөрмәт казанган, җаваплы, хезмәт сөючән Н.Ксенофонтов күп төрле Мактау грамоталарына, медальләргә лаек була.
Әңгәмәдәшебез дүрт ел элек вафат булган тормыш иптәше Анна Александровнаны сагынып искә ала.
- Илле җиде ел бер-беребезне аңлап, тату гаилә тормышында гомер уздырдык. Балаларыбыз Татьянаны, Борисны тәүфыйклы, кешелекле итеп тәрбяләдек. Улыбыз Борисның дөньядан иртә китүе йөрәккә төзәлмәслек яра салды. Язмышыбыз шундый булгандыр инде, - дип уфтана ветеран.
Балык тотуны, бакча үстерүне үз иткән Николай Дмитриевич оныклары Алексейны, Еленаны да шул мавыгуларга тарткан. Хәзер буын җебен дәвам итүче өч оныкчыгының үсеп килүенә шатланып яши.
Тугызынчы дистәсен ваклаган ныклы, көр күңелле, ачык йөзле, оптимист булып калган ветеранга сәламәтлек, бәрәкәтле гомер телибез.
Ф.Вахриева
Р.Сәхапов фотосы
Телефон АО «ТАТМЕДИА»: (843) 222 09 84