Бөтендөнья Гармония йөгерешенә 25 ел

Эстафета традиция буенча Нью-Йоркта БМО штаб-фатирыннан старт ала. Катнашучы илләр церемония барышында төп уттан факеллар яндыралар. 25 июльдә Астана шәһәрендә тантаналы финиш оештырылачак. 140 дәүләт кешесен берләштергән чарада катнашучылар маршруты 22 июнь көнне Менделеевскидан узды. Йөгерешчеләрне шәһәр башкарма комитеты вәкилләре, яшьләр эшләре, спорт һәм туризм бүлеге, мәдәният идарәсе хезмәткәрләре, яшь спортчылар һәм башкалар сәламләде. Сәламәт яшәү рәвешен үз итүче һәм спортны яратучы 1 нче мәктәп укучысы Нәфис Сираҗетдинов, студент Иван Егоров, "Батыр" спорт мәктәбе тренеры Анастасия Елизарова, йөзү инструкторы Лариса Назарова Монголиядән, Белоруссиядән, Украинадан, Удмуртиядән, Түбән Новгородтан килгән эстафетачылар белән бергә "Метелица" юл-комплексыннан алып Карпов исемендәге химия заводы санаторий-профилакториена кадәр юлны бергә йөгереп уздылар. Аларга чара флагы, факел тапшырылды. Очрашу барышында йөгерешчеләр чара тарихын бәян кылдылар.

Гармония йөгереше 1987 елда спортчы, философ, рәссам, музыкант һәм шагыйрь Шри Чинмой тырышлыгы белән туган. Аның максаты: халыклар арасында дуслык һәм бердәмлек идеалларын җәелдерү. Бу башлангычны хуплап каршы алганнар хәзер биш миллионнан артык.

Бердәм идея белән бәйләнгән яшьләр үз телләрендә эстафета гимнын башкардылар һәм җыелганнарга мәрхәмәтлелек символы буларак кәгазь күгәрченнәр тапшырдылар. Район җитәкчесе урынбасары вазыйфаларын башкаручы Павел Миронов менделеевлылар исеменнән аларга уңышлар теләде. Спортчылар 23 июньдә Ижевск шәһәренә юнәлделәр. Аларны куркынычсызлык максатларында ЮХИДИ автомобиле дә озата барды.