Чирек гасыр завод белән бергә

"Менделеевсказот" күп эшчеләр өчен тормыш мәгънәсе, һөнәри осталык һәм тәҗрибә туплау урыны булды. Капиталь төзелеш бүлеге начальнигы Ирина Соловьёва да шундыйлар исәбендә.
- Бирегә 1985 елның маенда инженер булып килдем, - дип сөйли Ирина Алексеевна. - Яшь белгеч буларак Кострома шәһәреннән Л.Карпов исемендәге химия заводына юллама алдым, бер ел эшләгәннән соң шунда химия заводы төзелеше башланасын белдем.
Бу төзелешкә илнең төрле почмакларыннан романтиклар агылды. Миндә дә үземне сынап карау һәм төзелештә катнашу теләге туды.
1983 елда Полянка авылы урынындагы чиста басуда Яңа Менделеевск заводы төзелеше башлана. Ул вакытта төзелеш буенча директор урынбасары Натан Петрович Фишман була. Инфраструктура объектларына, төзелеш индустриясе базасына һәм җитештерүнең үзенә 743 гектар җир бирелә. Һәркайсы берничә җитештерүдән: аммиак, концентрацияләнмәгән азот кислотасы, аммиак селитрасы, капролактам һ.б.лардан торган комплексны дүрт чират белән төзү планлаштырыла. Әмма үзгәртеп кору комачаулый, дәүләт инвестицияләре туктатыла, аммиак селитрасы һәм концентрацияләнмәгән азот кислотасы җитештерү буенча беренче комплексны гына төзеп өлгерәләр.
- Берничә ел узганнан соң ТР Дәүләт Советы депутаты Ринат Ханбиков ярдәме белән үзебездә җитештерелгән аммиак булачак, - ди предприятие ветераны. - Аммиак, метанол һәм карбамид җитештерү буенча комплекс төзү күптән башланды һәм берничә елга сузыла. Аңа Сергей Шевченко җитәкчелегендә заводның күп белгечләре җәлеп ителә. Һәм хәзер озакламый тәмамланачак заманча производствоның яңа корпуслары калкып чыгуны горурлык белән күзәтәм. Яңа предприятие эшли башлауга яшь белгечләргә ихтыяҗ арта, алар - безнең киләчәгебез. Әһәмияткә ия теге яки бу вакыйгада катнашуыңны яки шаһиты булуыңны искә төшергәндә йөрәк ешрак тибә башлый. Чөнки болар - химия җитештерүе гигантларының тарих битләре, ә мин анда катнаштым, язмышым предприятие язмышы белән үрелеп бара.
Заводның Соловьёвлар династиясен язмабыз героеның өлкән улы - ремонт-төзелеш цехы начальнигы Станислав Борисович дәвам итә. Июнь аенда Ирина Алексеевна 55 яшьлек юбилеен билгеләп үтә. Ул үсеп килүче яраткан оныклары Дима һәм Эвита да гаиләнең иң яхшы традицияләрен дәвам итүчеләр булырлар дип ышана.