Менделеевск яңалыклары

Менделеевск районы

18+
Рус Тат
2024 - год Семьи
Җәмгыять

Чор рухы буларак спорт хәрәкәте

Ф.Баһаветдиновның Бондюг химия заводында физкультура хәрәкәтен оештыручы буларак эшчәнлеге турында хатирәләре Яшьлек елларында һәм армиядә спорт белән актив шөгыльләнгәнлектән, физик культура инструкторы итеп билгеләнүемне энтузиазм белән кабул иттем. Эшчәнлегемне "Химик" ирекле спорт җәмгыятенең беренчел оешмасын ныгытудан башладым. 1956 елда СССР Спартакиадасына старт бирелде, көчне җәйге завод спартакиадасын үткәрү белән сынап...

Ф.Баһаветдиновның Бондюг химия заводында физкультура хәрәкәтен оештыручы буларак эшчәнлеге турында хатирәләре


Яшьлек елларында һәм армиядә спорт белән актив шөгыльләнгәнлектән, физик культура инструкторы итеп билгеләнүемне энтузиазм белән кабул иттем. Эшчәнлегемне "Химик" ирекле спорт җәмгыятенең беренчел оешмасын ныгытудан башладым.

1956 елда СССР Спартакиадасына старт бирелде, көчне җәйге завод спартакиадасын үткәрү белән сынап карадык. Завод буенча барлык службалар һәм цехлар начальникларын спартакиадада актив катнашырга мәҗбүр итүче приказ чыкты. Химия заводы директоры Василий Федорович Вольнов ярдәме белән кирәкле җиһазлар, спорт инвентаре һәм форма сатып алуга даими финанслар бүлеп бирүгә ирешелде. Беренче чиратта завод цехларында волейбол командалары тупланды. Энтузиастлар күнекмәләр өчен цехларның ташландык участокларын чистарттылар һәм волейбол мәйданчыкларын җиһазладылар. Аерым цех начальникларын эшчеләр өчен спорт белән шөгыльләнүнең файдасы турында инандырырга туры килде. Төп масса минем инициативаны хуплады. Ремонт-механика цехы начальнигы Павел Петрович Гудовский (өлкән мастер Хәким Вафинович Хәлимуллин да ярдәм итте), электр цехы - Александр Степанович Землянов, сульфат тозлары - Валентин Сергеевич Иванов (физрук Геннадий Гаврилов), гипосульфит - Надежда Михайловна Беляева (физрук Николай Чершинцев), хлорлы барий - Тимерхан Габдуллович Әхмәтов, контакт - Ральников, реактив тозлар - Генриетта Садриевна Кобзева, тара цехы - Павел Морозов, ремстрой цехы начальнигы Иван Васильевич Тюриков аеруча активлык күрсәттеләр. Графикны үтәү өчен завод цехлары арасында иптәшләрчә очрашуларны һәм уеннарны төшке аш вакытында да оештыра алдык. Финал уеннары стадионда гомумпоселок чарасы буларак үткәрелде. Бондюглылар гаиләләре белән стадионга йөрергә чыгарга яраттылар, анда китапханә эшләде, махсус ясалган мәйданда баян, кайвакыт тынлы оркестр астында бию кичәләре оештырылды. Яшел зона Сабантуй үткәрергә дә мөмкинлек бирде.
Ул елларда ук заводлылар арасында шахмат уены популярлык казанды. Цех беренчелегенә ярышта финалга чыгучылар завод комитетының утырышлар залында тантаналы төстә осталыкларын күрсәттеләр. Поселокның чын интеллигентлары - ПТО начальнигы Аркадий Иванович Моско, тәэминат бүлегеннән Василий Иванович Садыйков, завод поликлиникасының теш врачы Евгений Павлович Бетгер, үзәк электр станциясеннән Михаил Федорович Сысоев һәм даими җиңүче Юрий Дюжакин шахмат уйнарга яраттылар. Бондюг поселогы өчен яңа уен - өстәл теннисы да үзләштерелде. Теннис өстәлләре цехларның кызыл почмакларында, завод идарәсендә, стадионда урнаштырылды. Гассар исемендәге клубта волейбол, шахмат, өстәл теннисы, акробатика һәм гимнастика буенча секцияләр оештырылды. Акробатика һәм гимнастикадан балалар белән мин үзем шөгыльләндем, армиядә булганда спорт залларында алган күнекмәләр ярдәмгә килде. Чыгыш ясаулар өчен кирәкле форма һәм җиһазларны Казан складларыннан үзем сайладым.
Шуның өстенә, футбол, җиңел атлетика, волейбол, городки һәм хәтта йөзү буенча ярышлар үткәрелә. Завод спортчылары иптәшләрчә матчларда актив катнаштылар. Күп мәртәбә Минзәлә, Чистай һәм Казанга бардык. Анда барулар, бигрәк тә Кама буйлап пароходта, онытылмас тәэсирләр калдырды. Волейболчылар аеруча уңышка ирештеләр. 1957-1961 елларда химия заводы командасы Татарстан шәһәрләре арасында чемпион булды. Сергей Подгорный һәм Римма Моисеева чаңгы ярышларында республика чемпионатында еш кына җиңүчеләр булдылар.
Заводның футбол командасы да яхшы уйнады. Футболчылар Василий Алексеевич Чершинцев һәм аның улы Николай, Сергей Отрыганьев, Александр Беспалов, Владимир Половников, Владимир Гаврилов, Нәҗип Шәрипов, бертуган Казаковлар, Петр Семинихин, бертуган Рәвис һәм Марат Шакировлар, Вагыйз Садыйков, бертуган Козыревлар, Владимир Капитонов, бертуган Закировлар, Рафис Мөхәммәтҗановның уйнаганын карарга килүчеләр шактый була иде.
"Коммуна" театры бинасы янында боз катогы ясау поселокта ул еллар өчен казаныш булды, аңа электр яктырткычлары да сузылды. Прокатка ботинкалар, тимераяк өләшү пункты оештыру мөмкинлеге табылды (гадәттә киез итекләргә бәйләп шуалар иде). Гассар исемендәге клубта прокатка чаңгы һәм таяклар бирү базасы да ачыла, бу спорт төре белән мавыгучылар аеруча күп була.
Заводның комсорглары һәм физруклары ролен билгеләп үтмәсәк, ул чорның рухын тулаем күзаллап булмас иде. "Химик" ирекле спорт җәмгыятен минем якын дусларым җитәкләде: рәисе Вагыйз Садыйков булды, Николай Чершинцев - аның алыштыргысыз ярдәмчесе. Безнең оешкан команда тырышлыгы белән шундый нәтиҗәләргә ирешелде, спорт яшь бондюглыларның яраткан шөгыленә әйләнде.

Следите за самым важным и интересным в Telegram-каналеТатмедиа


Оставляйте реакции

0

0

0

0

0

К сожалению, реакцию можно поставить не более одного раза :(
Мы работаем над улучшением нашего сервиса

Нет комментариев

Теги: Менделеевск яћалыклары Чор рухы буларак спорт хђрђкђте

2
X