Энесенә үрнәк

Якташыбыз Алмаз Әхмәдиев Йошкар-Олада стратегик билгеләнештәге ракета гаскәрләрендә хезмәт итә.
Әхмәдиевлар Песәйдә яши. Алмаз мәктәптән соң педагог-психолог һөнәрен сайлый, яхшы билгеләренә генә Яр Чаллы педагогия институтын тәмамлый.
- Ул хезмәткә 9 июньдә, Сабантуй көнендә китте, - дип сөйли әти-әнисе Миләүшә Дамировна һәм Зөфәр Сәхабетдинович. - Имтиханнарын вакытыннан алда тапшырды, дипломын алырга өлгермәде, аны безгә бирделәр.
Алмаз балачактан спорт белән шөгыльләнә: көн саен йөгерә, җәен йөзә, кышын чаңгыда шуа. Спорт чыныгуы армиядә үз ролен уйный. "Марш-ыргылышларны да җиңел кичерәм", - ди ул туганнарына.
- Улым һәр нәрсәдә энесе Айдарга үрнәк, - дип дәвам итә М.Әхмәдиева. - Алар беркайчан да армиягә бармый калу турында уйламадылар. Кече яшьтән үк хезмәт итәчәкләренә ышандылар. Хәзер Айдар КамПиның соңгы курсында. Язгы чакырылышны көтә.
Алмаз, мөмкинлеге булганда, әти-әнисе белән телефоннан сөйләшә, Интернет аша аралаша, хезмәте турында яңалыклары белән бүлешә.
Күптән түгел Әхмәдиевларга часть командованиесеннән Рәхмәт хаты килгән, анда мондый юллар бар: "Улыгызны чын ир һәм лаеклы Ватан сакчысы итеп тәрбияләгәнегез өчен сезгә ихластан рәхмәт белдерәбез".

Рәхилә Мирзаянова