Галия апа Гайнетдиновага 90 яшь тулды

Күптән түгел Галия апа Гайнетдиновага 90 яшь тулды. Юбилярны бу вакыйга белән туганнары һәм якыннары, район башлыгы исеменнән аның урынбасары Ләйсән Галеева котладылар.

Галия апа безгә үзе, авыр, ләкин кызыклы тормышы турында сөйләде. Ул күпбалалы гаиләдә туа, биш бертуган үсәләр. Сугыш елларында Түбән Тагилга хезмәт армиясенә чакырыла. 1945 елда Бондюгка, туганнары янына кайта. Биредә туберкулез санаториенда нянечка, 5 нче һәм 3 нче балалар бакчаларында эшли. Г.Гайнетдинованы һәрвакыт сабырлык, хезмәт сөючәнлек кебек сыйфатлар аерып тора, шуңа да балалар белән эшли ала, коллегалары арасында хөрмәт казана.

Галия Сөләймановна язмышын Сәетнур белән бәйли. Алар уртак тормышта 53 ел яшиләр, уллары Рәшитне үстерәләр. Гайнетдиновлар еш кына бергә җыелалар, гаилә традицияләрен саклыйлар, шатлык һәм кайгыларны уртаклашалар, үзара ярдәмләшеп яшиләр.
- Мин апаны бик яратам, ул әнием кебек, - ди туганының кызы Рәмзия Гобәйдуллина. - Иң авыр минутларымда янәшәмдә булды, киңәшләре, җылы сүзе белән ярдәм итте. Әле хәзер дә аерылмыйча яшибез.
- Озын гомерле булуының сере нәрсәдә?
- Апаның озын гомерле булуы, тормыш девизы гади: "Кеше һәрвакыт үзе һәм әйләнә-тирәдәгеләр белән гармониядә яшәргә тиеш", - ди әңгәмәдәшем. - Ул беркайчан да усал, көнчел булмады, тормышны ничек бар, шулай яратты. Өлкән яшьтә булуына карамастан, актив тормыш алып бара, саф һавада йөрергә ярата, бик күп укый. Чәчәкләр үстерә, кыңгырау һәм миләүшәләргә өстенлек бирә. Аның эчке дөньясы бай, мәхәббәт, хезмәт, үз тормыш принциплары белән сугарылган. Апа, әнием кебек үк, дини, намазлар укый.
Әйләнә-тирәдәгеләр фикеренчә, юбиляр чын мәгънәсендә бәхетле кеше. Аннан позитив энергия бөркелә, юмор хисенә бай. Ветеранның ихлас елмаюына каршы елмаймый мөмкин түгел. Галия Гайнетдиновага ныклы сәламәтлек, рух көрлеге юлдаш булсын.