Халык проблемаларның хәл ителүен көтә
Төзекләндерү мәсьәләсен хәл итүдә ярдәм сорап шәһәрнең Ушковлар урамы 11 нче йортта яшәүчеләр редакциягә мөрәҗәгать итте. Июнь азагында булган көчле давыл сизелерлек эзләр калдырды: теге яки бу урында төбе-тамыры белән йолкынган агачлар һәм сынган ботаклар аунап ята. Коммуналчылар аның бер өлешен тиз арада җыештырды, ә калганнары әлегә кадәр ятуын дәвам...
Төзекләндерү мәсьәләсен хәл итүдә ярдәм сорап шәһәрнең Ушковлар урамы 11 нче йортта яшәүчеләр редакциягә мөрәҗәгать итте.
Июнь азагында булган көчле давыл сизелерлек эзләр калдырды: теге яки бу урында төбе-тамыры белән йолкынган агачлар һәм сынган ботаклар аунап ята. Коммуналчылар аның бер өлешен тиз арада җыештырды, ә калганнары әлегә кадәр ятуын дәвам итә.
- Өч атна үтте. Безнең өй янындагы тирәк шул килеш ята, - диләр менделеевлылар. - Балалар өчен куркабыз, алар анда уйный, җәрәхәтләнүләре бар.
Хезмәт ветераны Галия апа Ганеева, форсаттан файдаланып, корреспондентны өйләренә чакыра. Подъезд идәне һәм баскычы селкенә, тотрыклы түгел, озакламый файдалану мөмкин булмас кебек.
- Минем ирем сугышта катнашкан, аяклары авырта, таяк белән йөри. Урамга чыгу аның өчен зур кыенлык тудыра. Ул гына түгел, бу йортта күбрәк өлкән яшьтәгеләр яши, аларга шушы шартлар белән килешергә туры килә, - ди Галия апа. - Берничә мәртәбә мөрәҗәгать иттек, ләкин безне беркем дә ишетергә теләми.
Күрше подъезд янында килеп чыгуы билгесез чокыр хасил булган. Чүп-үлән арасыннан ул күренми, өлкәннәр яки балаларның анда егылып төшүе бар, бигрәк тә тәүлекнең караңгы вакытында. Рамис Вәлиев әңгәмәбезгә кушыла.
- Әгәр сез безнең проблема турында газетага язсагыз, ярдәме булырмы? - дип сорау бирә ул.
Хушлашканда Галия апа көрсенеп куя:
- Шунысы аяныч. Без сугышны кичердек, гомеребез буена эшләдек, ә хәзер көнкүрештәге вак мәсьәләләрне хәл итүне еллар буена көтәбез.
Бурмистров урамында яшәүчеләр 6 нчы балалар бакчасы каршындагы кызыл кирпечтән ясалган түтәлләрдә ел саен төрле төстәге чәчәкләр булган чакларны моңаеп искә алалар. Бүген анда "эт эчәгесе" үләне генә түгел, урыны белән саргаеп өлгергән алабута хуҗалык итә. Шәһәр урамнарында андый чәчәк түтәлләре бишәү, барысын да чүп үләне баскан.
Подъезд төбендә утыручы шәһәрлеләр төзекләндерү, яшелләндерү проблемасы турында кызу-кызу гапләшәләр. Берәүләр әйтә, чәчәк утыртмагач, түтәлләрне алырга кирәк, - ди. Башкалары, ул урынга тагын машина куярлар дип сагая. Корреспондент кулында видеокамера күргәч, пенсионерлар сүзсез кала.
- Нәрсәдән куркасыз? - дип сорыйм.
- Без карт инде, яшьләр сөйләсен, - диешәләр.
Аерым әбиләр шулай да исемнәрен атадылар. Елизавета Богатова, Тәнзилә Идиатуллина подъезд янындагы яшелләндерелгән участокларны күрсәтәләр, битараф булмаган пенсионерлар анда чәчәк утырткан.
Гаделлек өчен әйтергә кирәк, шәһәрнең Юбилейная урамы, Геройлар аллеясы, шулай ук аерым предприятие һәм учреждениеләр янында чәчәкләр үсә.
Шәһәр башкарма комитеты җитәкчесе Рафаэль Сабитов аңлатма бирә:
- Ауган, сынган агачлар күп, мөмкинлек булган саен җыештырабыз. Бу күләмле эш. Калганнарына да чират җитәр. Ушков урамы 11 нче йорт подъездының баскычлары проблемасы безгә таныш. Аны ясарбыз. Быел дөрестән дә урамнарда чәчәк аз утыртылды, финанс җитми, киләсе елга күбрәк булыр.
Гөлүзә Гыйләҗетдинова, автор фотолары
А так клумба выглядела в недалеком прошлом
Иң мөһим һәм кызыклы язмаларны Татмедиа Telegram-каналында укыгыз
Телефон АО «ТАТМЕДИА»: (843) 222 09 84