Менделеевск яңалыклары
  • Рус Тат
  • Химиклар көне – уртак бәйрәм

    Шимбә көнне шәһәр стадионында менделеевлылар химиклар көнен билгеләп үтте. Элеккеге традиция буенча, бәйрәм тантанасы химия предприятиеләре коллективлары парады белән ачылды. Колоннада химия производствосы алдынгылары, ветераннар, күренекле династияләр вәкилләре һәм яшьләр атлый. Карпов исемендәге химия заводы хезмәткәрләре Лиана һәм Әнвәр Кармовлар өчен Химиклар көне - гаилә бәйрәме, шунлыктан балалары Аделина һәм...

    Шимбә көнне шәһәр стадионында менделеевлылар химиклар көнен билгеләп үтте.
    Элеккеге традиция буенча, бәйрәм тантанасы химия предприятиеләре коллективлары парады белән ачылды. Колоннада химия производствосы алдынгылары, ветераннар, күренекле династияләр вәкилләре һәм яшьләр атлый.
    Карпов исемендәге химия заводы хезмәткәрләре Лиана һәм Әнвәр Кармовлар өчен Химиклар көне - гаилә бәйрәме, шунлыктан балалары Аделина һәм Элина белән килгәннәр. Бәлки алар да киләчәктә химиклар династиясен дәвам итүчеләр булыр.
    Электр цехы мастеры Роза Габизинова химия предприятиесендә 27 ел хезмәт куя.
    - Әтием Сәйяр Яруллович заводка 40 елдан артык гомерен биргән, - дип сөйли Роза Сәйяровна.
    Ире Илдус - күрше колоннада, чирек гасырга якын эшләгән "Менделеевсказот" предприятиесе хезмәткәрләре арасында. Габизиновлар заводларның җәмәгать тормышында актив катнашалар. Бер генә үзешчән сәнгать смотры да Розадан, спорт ярышлары Илдустан башка үтми. Менделеевлылар белән бәйрәм шатлыгын уртаклашырга ТР Дәүләт Советы депутатлары Ринат Ханбиков, Леонид Барышев, ТР Сәнәгать һәм сәүдә министрлыгының нефть һәм газ химиясе комплексы идарәсе начальнигы Алексей Беляев, химия промышленносте хезмәткәрләренең профсоюз комитеты рәисе Татьяна Левагина һ.б.лар килде.
    Район башлыгы Игорь Привалов химикларга ихлас күңелдән котлау юллады. Ул билгеләп үткәнчә, ике предприятие өчен дә бу ел - юбилей елы, Карпов исемендәге химия заводына - 145, "Менделеевсказот" предприятиесенә нигез салынуга - 30 ел.
    Предприятиеләр директорлары Дамир Шәмсин, Фирдис Абдрахмановның котлаулары, иң яхшы хезмәткәрләренә ведомствоның бүләкләрен тапшыру көчле алкышлар астында булды.
    Бүләкләнүчеләр арасында "Менделеевсказот" мастеры Эльвира Илдарханова.
    - Коллективта 24 ел эшлим, - ди Эльвира Миңнехановна.
    Аның өчен Мактау грамотасы - күпьеллык намуслы хезмәтен тану, киләчәк эшчәнлеккә этәргеч.
    Спорт мәйданчыкларына предприятиеләр командалары һәм җанатарлар җыелган. Волейбол буенча ярышта карповлыларның ирләр һәм хатын-кызлар командалары өстенлек алды. Футбол матчында "Менделеевсказот" җиңде.
    Шахмат буенча беренче урын яулаган Рамил Әбдерәшитов кабат осталыгын дәлилләде. Рамил Вәлиев гер спортында җиңүче булды.
    - Ярышлар нәтиҗәсе буенча "Менделеевсказот" командасы беренче урында, - диде баш судья Ринат Фәттахов.
    Җиңүчеләргә диплом һәм призлар бирелде. Бу көнне менделеевлыларга Казан җырчысы Фирдүс Тямаев, үзешчән сәнгать артистлары иң яхшы җырларын бүләк иттеләр.
    Ольга Смолькова

    Иң мөһим һәм кызыклы язмаларны Татмедиа Telegram-каналында укыгыз


    Нравится
    Поделиться:
    Реклама
    Комментарии (0)
    Осталось символов: