Менделеевские новости
  • Рус Тат
  • Әхмәтҗановларның гаилә бәйрәме

    Бу якшәмбедә гади һөнәр ияләре - торак-коммуналь хуҗалык, халыкка көнкүреш хезмәте күрсәтү һәм сәүдә өлкәсе хезмәткәрләре бәйрәмнәрен билгеләп үтәләр. Шул уңайдан дистә еллар гомерләрен ТКХ һәм сәүдә системасында эшләүгә багышлаган шәһәрдәшләребез турында язма тәкъдим итәбез. Р.Әхмәтҗанов Бондюг поселогында туып үскән. Җиденче сыйныфны тәмамлагач, һөнәр училищесында белем ала. Аннан бәхет эзләп...

    Бу якшәмбедә гади һөнәр ияләре - торак-коммуналь хуҗалык, халыкка көнкүреш хезмәте күрсәтү һәм сәүдә өлкәсе хезмәткәрләре бәйрәмнәрен билгеләп үтәләр. Шул уңайдан дистә еллар гомерләрен ТКХ һәм сәүдә системасында эшләүгә багышлаган шәһәрдәшләребез турында язма тәкъдим итәбез.



    Р.Әхмәтҗанов Бондюг поселогында туып үскән. Җиденче сыйныфны тәмамлагач, һөнәр училищесында белем ала. Аннан бәхет эзләп Пермь якларына чыгып китә. Кизел шәһәрендә шахтада электровоз машинисты булып берничә ел эшли. 1971 елда Чаллының гидромеханизация оешмасына кранчы булып урнаша. Аннан химия заводына слесарь булып күчә. Ун елдан соң, торак мәсьәләсен хәл итү өчен, Түбән Камадан килгән күчмә төзелеш оешмасында монтажлаучы вазифаларын башкара. 1987 елда Әхмәтҗановлар гаиләсе уңайлыклары булган өч бүлмәле фатир ала. Шуннан соң гаилә башлыгы Карпов исемендәге химия заводының сульфат тозлары җитештерү цехына слесарь булып эшкә керә. Һәм, яше җитеп пенсия рәсмиләштергәнче, лаеклы ялга чыкканнан соң да өч ел шул предприятиедә хезмәт куя.
    Тынгы белмәс, куллары һәрвакыт физик эш таләп итә торган Рафаил абый дүрт стена арасында тик утыру белән ризалашмый. Торак-коммуналь хезмәтләрдән файдаланган өчен түләргә баргач, кассирдан "Сезгә эшчеләр кирәкмиме?" дип кызыксына. Тегесе: "Эшләргә теләгең бармыни?" - дип сорый һәм мәгълүматны күңеленә салып куя. Күпмедер вакыттан Р.Әхмәтҗановка эш тәкъдим итәләр. Шулай итеп, коммуналь системада 13 елдан артык хезмәт куя.
    - Мин кермәгән фатир, төшмәгән подвал калмагандыр, - дип искә ала ул вакытны ветеран. - Участок начальнигы Мария Шәймөхәмәтова таләпчән, шул ук вакытта гадел, кеше хәленә керә белә торган иде. Берәр җирдә төзексезлек булса, көн димәде, төн димәде, безнең белән бергә булды, резин итеген киеп подвалга да төште, кирәк икән - чардакка да менде.
    Тормыш иптәше Фаина Кирилловна белән 40 елдан артык бергә гомер кичерәләр, ике ул һәм бер кыз үстереп, мөстәкыйль тормышка озатканнар, биш оныклары үсеп килә. Фаина Кирилловна халыкка сәүдә хезмәте күрсәтү өлкәсе ветераны, 29 ел ОРС системасындагы кибетләрдә сатучы булып эшләгән.
    Рафаил аганың фидакарь хезмәте Мактау грамоталары, Рәхмәт хатлары белән билгеләнгән, фоторәсеме Мактау тактасын бизәгән.
    Бүген ул лаеклы ялда, балык тотарга ярата. Бакча участокларында - "баш агроном". Төрле яшелчә, җиләк-җимеш үстерүдән, җирдә казынудан ләззәт ала, тәм таба.
    Якшәмбе көнне билгеләп үтеләчәк датаны Әхмәтҗановларның гаилә бәйрәме дип атарга була. Рафаил Миңнеханович - ТКХ, Фаина Кирилловна - сәүдә ветераны. Без дә фидакарь хезмәтләре белән Бондюг елъязмасына өлеш керткән Әхмәтҗановларны тәбриклибез, иминлек, күңел көрлеге телибез.

    Нравится
    Поделиться:
    Реклама
    Комментарии (0)
    Осталось символов: