Хәтерлим мин әле бүгенгедәй...
Бүген без Укытучылар көнен билгелибез. Бу бәйрәм уңаеннан корреспондентлар яраткан укытучылары турында сөйләгән, мәктәп хатирәләрен яңарткан менделеевлылар белән әңгәмә кордылар. Олеся Толстогузова, 1998 елда 2 нче мәктәпне тәмамлаган: - Минем уйлавымча, кешеләрнең күпчелеге остазлары дип беренче укытучыларын исәпли. Минем өчен ул Гөлнара Фридовна Павлова. Аның тырышлыгы нәтиҗәсендә мәктәп еллары позитив,...
Бүген без Укытучылар көнен билгелибез. Бу бәйрәм уңаеннан корреспондентлар яраткан укытучылары турында сөйләгән, мәктәп хатирәләрен яңарткан менделеевлылар белән әңгәмә кордылар.
Олеся Толстогузова, 1998 елда 2 нче мәктәпне тәмамлаган:
- Минем уйлавымча, кешеләрнең күпчелеге остазлары дип беренче укытучыларын исәпли. Минем өчен ул Гөлнара Фридовна Павлова. Аның тырышлыгы нәтиҗәсендә мәктәп еллары позитив, танып белү шатлыгы, изгелек һәм мәхәббәт атмосферасы белән тулы иде. Тормыш юлымны яктыртучы дип Гөлүзә Җәүдәтовна Бондареваны исәплим. Ул - талантлы педагог, иҗади шәхес. Дәресләре кызыклы, гадәти булмаган иде. Мин КФУның Алабуга филиалында педагоглыкка укыйм һәм хәзер аның укыту методикасын камилләштерүенә күпме көч сарыф иткәнлеген аңлыйм.
Рәхилә Мехәмәтханова, 1987 елда Бәзәкә урта мәктәбен тәмамлаган:
- Быел безнең чыгарылышка 25 ел булды. Туган мәктәбебездә сыйныфташлар һәм укытучылар белән очраштык. Безгә гаҗәеп мөгаллимнәр белем бирде. Ирле-хатынлы Гыймазовларга аерым рәхмәт сүзләре әйтәсе килә. Дамир Гарифҗанович сыйныф җитәкчебез иде, бездә математика укытты, директор да булды. Фәнен яхшы белүе белән аерылып торды, оештыру сәләтенә ия, баянда, курайда уйнады, бер генә чара да аның катнашыннан башка узмады. Шәмсия Галиевна бездә - татар балаларында - рус теленә һәм әдәбиятына мәхәббәт тәрбияли алды. Ул теманы гади, ләкин тирән итеп аңлата, ныклы белемнәр бирә, мавыктыргыч дәресләр уздыра. Без шигырьләр укыйбыз (кайберләрен әле дә яттан беләм), анализлыйбыз, тәэсирләр белән уртаклашабыз. Юлыбызда шундый интеллигент, эрудицияле, безне һәм үз һөнәрләрен яраткан педагоглар булуына чын күңелдән рәхмәт әйтәбез.
Роза Калмыкова, 1983 елда 1 нче мәктәпне тәмамлаган:
- Бәйрәм уңаеннан физкультура укытучыларына рәхмәт белдерәсе, аларның яшьләрне тәрбияләүдәге ролен билгелисе килә. Гадәтттә, математика укытучылары, филологлар турында күбрәк сөйләнә, физкультурачылар икенче планда кала. Бу дөрес түгел. Минем ышануымча, яшьтәшләремнең күбесе мәктәп елларын искә төшергәндә физкультура дәресләренең зур шатлык китергәнен әйтерләр. Безне төрле вакытларда В.Наборщиков, П.Маяков, ирле-хатынлы Медведевлар укытты. Бөтен класс белән диярлек волейбол һәм баскетбол секцияләренә йөрдек. Софья Абдулловна һәм Николай Иванович бездә команда бердәмлеге тәрбияләделәр, спорт сәләтләребезне үстерделәр. Остазларыбыз белән бик теләп республика шәһәрләренә ярышларга йөрдек. Спорт, хәрәкәт активлыгы безнең тормышның алыштыргысыз өлеше иде, ә яраткан педагогларыбызга әле дә хөрмәтебез зур.
Александра Клюкина, 1976 елда 4 нче мәктәпне тәмамлаган:
- Минем тормышымда Елена Рувимовна Филиппова аерым роль уйнады. Нәкъ аның зирәк киңәше педагогия институтына керүемә этәргеч булды. Аны тәмамлагач туган мәктәбемә килдем, хәзер педстажым 30 ел. Үз укытучыларым янәшәсендә эшләве зур җаваплылык. Ул елларда Нэра Степановна Гыйззәтуллина, Галина Николаевна Максютина, Михаил Иванович Кузовов остазларым булдылар. Алар миңа киңәшләрен бирделәр, педагогик осталык серләре белән бүлештеләр.
Һөнәри бәйрәмнәре уңаеннан барлык укытучыларга күтәренке кәеф, сәламәтлек, игелекле укучылар телим.
Иң мөһим һәм кызыклы язмаларны Татмедиа Telegram-каналында укыгыз
Телефон АО «ТАТМЕДИА»: (843) 222 09 84
