Кар чистартуга машиналар комачаулый

Кыш үз хокукларына актив керде: көн саен диярлек кар ява, буран уйный. Коммуналь службалар көчәйтелгән режимда эшли.
Кар чистарту мәсьәләсе район башлыгы контролендә. Игорь Привалов көн саен шәһәрне йөреп чыга, тиешле службалар белән киңәшмә үткәрә.
- Барлык техника һәм кеше ресурслары шәһәр юлларын, тротуарларны, аллеяларны чистартуга җәлеп ителгән, - диде "Комфорт Успех+" ҖЧҖ директоры Әзһәр Каюмов. - Проблемалар да бар. Шуларның иң мөһиме - юл кырыйларында, торак йортлар ишегалларында санкцияләнмәгән парковкалар.
Район газетасы корреспондентлары рейд белән чыкты, шулай ук шәһәрлеләрнең фикерләре белән кызыксындылар.
Сәлимә Тихонованы без Химиклар урамында очраттык. Нәкъ биредә, "1000 төрле вак-төяк" кибетеннән башлап Тукай урамындагы Саклык банкына кадәр, машиналарның күплеге күзәтелә.
- Алар юлны чистартуга комачаулый дип уйлыйм, - ди әңгәмәдәшебез. - Автомобиль хуҗалары - якын-тирәдәге йортларда яшәүчеләр. Кайбер транспорт средстволары кыш башыннан файдаланмый - алар кар астында калган.
Владимир Гагарин да үз фикерен белдерде:
- Мин нигездә коммуналчылар хезмәтеннән канәгать. Беркетелгән территорияләрне чистартуга иртүк керешәләр. Ләкин һава торышы үз төзәтмәләрен кертә: кар һәм буран аларның эшенә комачаулый. Юл кырыйларында ничектер, ә ишегалларында машиналар күп.
Шәһәрдәге машина кую урыннарының берсенә кердек. Хуҗасы сүзләренчә, стоянкада буш урыннар бар, ләкин менделеевлылар үз ишегалларын кулай күрә. Ә бу куркынычсыз түгел: урлау, транспорт средствосын куып алып китү очраклары күп.
- Мин машинамны ишегалдына куям, - ди стажлы йөртүче Николай Васильев. - Тыныч йоклый алам, заманча автомобильләр куып алып китүгә каршы чаралар белән комплектланган.
Хәлгә ЮХИДИ бүлекчәсе начальнигы Тәлгат Фазлыев аңлатма бирде:
- Мәсьәлә эшлекле киңәшмәдә күтәрелде. Шәһәр буенча тиешле службалар вәкилләре белән уртак рейдлар оештырылачак, автохуҗаларга санкцияләр кулланылачак. Транспорт средствосын башка машиналарга хәрәкәт итүгә комачауларлык итеп юл кырыена куйган яки туктаган өчен кисәтү яки 2000 сумга кадәр штраф рәвешендә административ чара гамәлдә.
- Безгә Фомин урамындагы 18, 20, 22 нче йортлар территорияләре беркетелгән, - диләр Карпов исемендәге химзаводның ишегалды җыештыручылары Владимир Балобанов һәм Борис Ярушкин. - Баскыч төпләрен, подъездга керү урыннарын һәм йорт эче юлларын чистартабыз. Шәһәрлеләр максимум уңайлыклар тели, еш кына службаларны тәнкыйтьли. Ләкин уңайлыкларны бергәләп булдырырга кирәк: коммуналчылар - көндәлек хезмәтләре, автохуҗалар - җаваплы мөнәсәбәтләре белән.

Рәхилә Мирзаянова
Рәис Сәхапов фотосы