Менделеевск яңалыклары
  • Рус Тат
  • Каршылыкларны узган гына җиңүгә ирешә

    Сәүдә хезмәткәрләре һөнәри бәйрәмнәрен билгеләгән көннәрдә без бу өлкәдә бер дистә елдан артык эш алып баручы Алёна һәм Фёдор Мокеевлар белән аралаштык. Ничек башланды - Якыннарыбыз арасында сату-алу эше белән беркем дә шөгыльләнми. Ирем техник белемле, мин Казан химия-технология институтын тәмамладым. Якын дусларыбызның сантехника товарлары сату ноктасы бар иде. Алар...

    Сәүдә хезмәткәрләре һөнәри бәйрәмнәрен билгеләгән көннәрдә без бу өлкәдә бер дистә елдан артык эш алып баручы Алёна һәм Фёдор Мокеевлар белән аралаштык.
    Ничек башланды
    - Якыннарыбыз арасында сату-алу эше белән беркем дә шөгыльләнми. Ирем техник белемле, мин Казан химия-технология институтын тәмамладым. Якын дусларыбызның сантехника товарлары сату ноктасы бар иде. Алар безне дә шул өлкәгә тарттылар, - дип сөйли Алёна Валерьевна.
    Ул Карпов исемендәге заводта лаборант, смена начальнигы, соңрак тәэмин итү бүлегендә хезмәт тәҗрибәсе туплаган, ире шул ук предприятиедә өлкән мастер эшен башкарган. Тормыш иптәше белән яңа сфера нечкәлекләрен өйрәнәләр. Башлангыч чорда "Чулман" базарында танышларыннан акрынлап түләү шарты белән урын алалар, сантехника белән сату итә башлыйлар.
    - Яңа һөнәр үзләштерү җиңелдән түгел иде, күңел төшенкелегенә бирелгән, икеләнгән мизгелләр еш булды. Тик икебез дә холкыбыз белән артка чигенә торганнардан түгел. "Без кемнән ким, кыенлыкларны җиңәргә кирәк" дип, тырыштык. Һөнәрнең нечкәлекләренә төшенү вакыт, түземлек сорый, каршылыкларны узган гына җиңүгә ирешә, - дип фикерләре белән бүлешәләр Мокеевлар.
    Тырышлык бушка китми
    Бераз капитал туплагач, аерым кибет булдыралар ("Водолей"). Ассортиментлары да киңәя. Һәрдаим үз өстеңдә эшләргә, укырга, тәкъдим иткән материалны өйрәнергә кирәк. Иң мөһиме - клиентлар белән оста аралаша белергә: киңәш бирергә, дизайнер да, кайвакыт психолог та булырга туры килә. Беренче вакытта ял, отпуск турында уйларга да вакытлары булмый, чөнки аякка басканчы берничә ел узып китә. Алдагы чорда үзләре сату итсәләр, хәзер зур булмаган коллектив тупланган. Кул астында хезмәт куючылар өчен шартлар тудырырга, коллективта яхшы мөнәсәбәт булдырырга омтылалар.
    - Тәҗрибәле, үз һөнәрен җиренә җиткереп башкарган ышанычлы кешеләрне югалтмаска иде, чөнки яхшы кадрлар - ярты уңыш, - диләр әңгәмәдәшләребез.
    Берничә ел элек "Юбилейный" кибетен сатып алу мөмкинлегенә ирешәләр. Монда төзелеш материаллары, мототехника, электр-бензоинструментлар һ.б. белән сату бара. Товарлар исемлеге ике дистә меңнән артык.
    Алгы планда - сатып алучылар
    Мокеевлар, сатып алучыларның мәнфәгатен истә тотып, әйберләргә бәяләрне тоту, ассортиментны киңәйтү өстендә эшлиләр. Күрше өлкә, Татарстан предприятиеләрен товар белән тәэмин итәләр, алар белән тотрыклы элемтәләр урнаштырыга тырышалар.
    - Хәзер эш җайга салынды дисәк тә була, администратор булуы да зур ярдәм. Гаиләгә дә буш вакыт кала. Улларыбыз, әле кечкенә булуларына карамастан (Андрейга - 8, Васяга - 4 яшь), безнең хезмәт мәшәкатьләре белән кызыксыналар, гаилә бизнесын дәвам итәрләр, дип ышанабыз, - диләр Мокеевлар.
    Фәймә Вахриева

    Фото шәхси архивтан

    Иң мөһим һәм кызыклы язмаларны Татмедиа Telegram-каналында укыгыз


    Нравится
    Поделиться:
    Реклама
    Комментарии (0)
    Осталось символов: