Көмеш кәләш

автор, 23 апрель 2013 - 12:10

646

Менделеевск кызы Наилә Васильева "Бриллиант кәләш-2012" конкурсының республика этабы финалистлары өчлегенә керде. Күпсанлы туганнары һәм дуслары җан атып торган 14 конкурсант "Батыр" күңел ачу комплексына җыелды. Юкка гына оештыручылар кәләшләр фестивален матурлык бәйгесе генә түгел, гаилә, мәхәббәт һәм тугрылык триумфы дип әйтмәгәндер. Менделеевлыларның хуплау төркеме район флагы белән генә түгел,...

Менделеевск кызы Наилә Васильева "Бриллиант кәләш-2012" конкурсының республика этабы финалистлары өчлегенә керде.

Күпсанлы туганнары һәм дуслары җан атып торган 14 конкурсант "Батыр" күңел ачу комплексына җыелды. Юкка гына оештыручылар кәләшләр фестивален матурлык бәйгесе генә түгел, гаилә, мәхәббәт һәм тугрылык триумфы дип әйтмәгәндер. Менделеевлыларның хуплау төркеме район флагы белән генә түгел, команда рухы белән дә аерылып торды, кичә барышында тамашачылар рәтенә якташлар да өстәлде.

Жюри конкурста катнашучылар турында яхшырак белсен өчен, һәркайсы визит карточкасы әзерләде, кичәне алып баручы шоуменнар Венечка һәм Ирек кәләшләрнең тормышыннан кызыклы мизгелләр, аларның мавыгулары һәм хәтта хыяллары турында да сөйләделәр.

- Кызлар кыска кара күлмәкләрдә сәхнәгә чыкканда, ирексездән караш безнең Наиләгә төбәлде, - дип сөйли ЗАГС бүлеге мөдире Гөлнара Гудовская. - Аның мөлаемлыгы, нур чәчеп торган елмаюы, үзен сәхнәдә тотышы араларында профессиональ модельләр дә булган башка кызларга лаеклы конкурент булуын дәлилләде.

Конкурсларның берсе "Йон стилендәге кәләш" дип аталды, чөнки фестиваль җиденче тапкыр үтә, нәкъ менә җиде ел бергә яшәү йон туе дип атала. Наилә үзенчәлекле итеп бәйләгән күлмәктән чыкты, букеты да йоннан иде. Традиция буенча, ул аны жюри ягына ыргытты.

Спорт костюмында бию мәйданчыгына чыккан конкурсантлар ритмны тою, пластика, музыкага хәрәкәт итә белүләрен күрсәттеләр.

Бәйге нәтиҗәләрен җиткергәндә финалга чыгучылар арасында Наилә Васильеваны атагач, аның һәм җанатарларның ирексездән күзләре яшьләнде. Чөнки фестивальдә катнашу күпме көч һәм дулкынлану хисе таләп итте.

- Мин җиңүемә шатланам, - диде Наилә, - бу көнне миңа ярдәмгә килүчеләргә рәхмәт.

Чаллыдан Лилия Гобәйдуллина "Бриллиант кәләш" титулын яулады. Безнең Наилә Чаллыдан Ольга Корлыханова белән берлектә "Көмеш кәләш" титулына лаек булды. Кызлар Бөтенроссия турнирында Татарстан данын яклаячаклар. Ул 15 майда "Батыр" комплексында уза.

- Без Наиләгә Россия дәрәҗәсендә лаеклы чыгыш ясарга иганәче ролендә ярдәм итәргә теләүчеләр табылыр дип ышанабыз, - диде Гөлнара Сәетҗановна.

Ольга Смирнова