Кристаллардан букет

Вәсилә Мортазина

Карпов исемендәге химия заводының үзәк лабораториясе хезмәткәре Наталья Костина "Ел хатын-кызы. Ел ир-егете: 2013 елда хатын-кыз күзлегеннән" конкурсы лауреаты булды.

- Февраль аенда Мамадышта зона сайлап алу туры булды, - дип сөйли Наталья. - Мин катнашкан "Минем язмышым - минем һөнәрем" номинациясеннән тыш, "Хатын-кыз-ана", "Хатын-кыз-галим, "Үрнәк хатын-кыз", "Хатын-кыз-мәдәният һәм рухи байлык", "Изге йөрәкле ир-егет" һәм "Ир-егет-лидер" номинацияләре булды. Коллегаларым Марина Бондарь һәм Ирина Васькова миңа визит карточкасын игълан иткәндә химик тәҗрибә үткәрүдә ярдәм иттеләр, шулай ук элемтә бүлегеннән Гөлнара Харисова булышлык күрсәтте. Шуны билгеләп үтәргә кирәк, завод лабораториясе шартларында үстерелгән кристаллардан букет жюри әгъзаларын шаккаттырды.

Үз номинациясендә иң яхшы дип танылып, Наталья финалда катнашу хокукы алды, ул 6 мартта Казанда булды. Конкурсның йомгаклау этабында зона бәйгеләрендә җиңгән 80 кеше катнашты. Конкурсантлар барлыгы 200 кеше булды. Республикада мондый чаралар уздыру изге традициягә әйләнде. Аларның максаты - иҗтимагый тормышның барлык өлкәләрендә үз урынын тапкан заманча хатын-кыз һәм ир-егетнең уңай образын булдыру.

Иң яшь катнашучыларның берсе булып финалга чыгуының серен сорагач, Наталья, елмаеп:

- Туган шәһәрем, заводым, коллегалар, дусларым һәм, әлбәттә, туганнарымның булышлыгы ярдәм итте. Безнең нәселдә химиклар гына: династиябез бабайның әтисеннән башлана, әби белән бабай да заводта эшләгәннәр. Әти-әнием дә гаилә традицияләрен дәвам иткәннәр: әтием Николай Михайлович - автотранспорт цехында "КамАЗ" шоферы, әнием Анастасия Дмитриевна - әче күкертле барий җитештерү цехында аппаратчы, хәзер пенсиядә. Без дә әти-әниләр эзеннән киттек: апам Татьяна Түбән Камада "Нефтехим" предприятиесендә эшли, абыем Михаил - Казан Федераль университеты филиалы студенты. Мин һөнәр сайлаганда икеләнеп тормадым, дүрт ел элек Казан химия-технология институтын тәмамлаганнан соң язмышымны химия заводы белән бәйләдем.

Наталья химия белән генә яшәми, башка мавыгулары да күп. Буш вакытында чаңгы шуа, балыкка йөри, кул эшләре һәм фән белән шөгыльләнә. Наталья тагын Киров исемендәге Казан дәүләт технология университеты аспиранты, предприятиенең яшьләр Советы рәисе.