Көз-ямансуланырга сәбәп түгел

Эссе җәйдән соң М шәһәрендә көз башланды. Менделеевлылар һава торышының кискен алмашынуына сәерсенеп җылы киемнәргә төренделәр. Ләкин шәһәрлеләр болай гына бирешергә һәм кайгырып утырырга теләмиләр, чәнки күпләр өчен көз - беренче чиратта елның иң матур, хыяллар һәм өметләнүләр вакыты.

Яшьләрдән көзне нинди кәеф белән каршылауларын һәм аларның ничек итеп сагыш һәм эч пошудан арынуларын сорадык.

Гөлназ Стрелкова, 31 яшь, С.Гассар исемендәге мәдәният сараеның иҗат буенча директор урынбасары:

- Мин көзне яратам, аның төсләре мине илһамландыра. Яфраклар елның бу мизгелендә төрле төсләре белән шатландыра. Мондый матурлык фонында фотосессияләр ясау отышлы, аеруча әбиләр чуагында. Өйдә гаилә белән ял итүе рәхәт, яхшы компаниядә тәм-томнар белән кайнар чәй эчү, болар сиңа сагышланырга ирек бирмәячәкләр, - дип саный Гөлназ.

Радик Гыйниятуллин, 29 яшь, туризм буенча менеджер:

- Мин көзне яхшы кәеф белән каршы алам, гәрчә кояш җылысы һәм яктылык җитмәсә дә. Ләкин моңсуланмас өчен яраткан эшең белән шөгыльләнергә, ешрак урамда йөрергә һәм сәламәт яшәү рәвеше алып барырга кирәк. Мин еш кына рюкзак тулы кирәк-яраклар белән табигатькә чыгам, үзем белән палатка алам һәм көне буена аның матурлыгына сокланам. Күптән түгел урманга барып бер кәрзин гөмбә җыеп кайттым, алар арасында гөреҗдә һәм баллы гөмбә дә бар иде. Бу шөгыльдән бары тик уңай тәэсирләр генә алдым, - дип уртаклаша Радик.

Диана Миронова, 21 яшь, Россия дәүләт гадел хөкем университетының Казан филиалы студенты:

- Сәяхәт итегез, яраткан фильмнар карагыз, күңелле музыка тыңлагыз, үзегезгә ошаган китаплар укыгыз, хыялланыгыз, иҗат итегез, шул вакытта салкын көзләр җитүен тоймассыз да. Иң мөһиме, күңелегездә җылылык булсын, якыннарыгыз һәрвакыт көтеп торсыннар, дусларыгыз авыр вакытта ярдәм итсен һәм яраткан кешегез яныгызда булсын. Һәр көнне позитивны күбрәк тоегыз, тормышка шатланыгыз һәм барысы да яхшы булыр. Шул вакытта көз сезнең йөрәккә иң якын ел фасылы булып тоелыр, - ди Диана.