Менделеевск яңалыклары
  • Рус Тат
  • Людмила Тунгускова күптән түгел 70 яшьлек юбилеен билгеләп үтте

    Гомеренең яртысыннан күбрәген балалар тәрбияләүгә багышлаган педагогик эшчәнлек ветераны Людмила Тунгускова күптән түгел 70 яшьлек юбилеен билгеләп үтте. - Людмила Сергеевнаның юбилее искиткеч педагог, кешеләргә битараф булмаган һәм изге күңелле ханым, укытучылыкның ветераннар советы рәисе турында сөйләргә яхшы сәбәп, - дип язалар коллегалары, дуслары, элеккеге шәкертләре. Без аларның үтенечен бик...

    Гомеренең яртысыннан күбрәген балалар тәрбияләүгә багышлаган педагогик эшчәнлек ветераны Людмила Тунгускова күптән түгел 70 яшьлек юбилеен билгеләп үтте.
    - Людмила Сергеевнаның юбилее искиткеч педагог, кешеләргә битараф булмаган һәм изге күңелле ханым, укытучылыкның ветераннар советы рәисе турында сөйләргә яхшы сәбәп, - дип язалар коллегалары, дуслары, элеккеге шәкертләре. Без аларның үтенечен бик рәхәтләнеп үтибез, чөнки Л.Тунгускова озак еллар дәвамында безнең газетабызны укучы да.
    Людмила Сергеевна чирек гасырдан артык гомерен мәктәпкәчә мәгарифкә багышлаган, йөзләгән балаларны мәктәпкә әзерләп чыгарган. Люда кечкенәдән үк балаларны җыеп, мәктәпле уйный. Мәктәп елларында сыйныф җитәкчесенең уң кулы була. Мәктәптән соң институтка керә алмый, СМУ-39 оешмасына бухгалтер булып урнаша. Әмма педагог булу теләге көчәя генә. 1965 елның апрелендә ул мәктәпкә пионер әйдәманы булып күчә, шул ук вакытта Казан университетының читтән торып уку бүлегендә белем ала, соңрак Сарапулда мәктәпкәчә училище тәмамлый. 1 нче балалар бакчасында тәрбияче вазифасында педагогикага авыр, ләкин кызыклы юлы башлана. Ә ике елдан ул инде мөдир буларак бакча тормышында кайный башлый.
    Людмила Сергеевна иҗади коллективта энтузиастлар, фикердәшләр туплауга ирешә, аңа кадәр эшләгән коллегалары тәҗрибәсен һәм традицияләрне дәвам итә. "Алёнушка" балалар бакчасы әти-әниләр арасында популярлык, абруй казана, алар сабыйларын коллективка ышанып тапшыра. Даими камилләшеп, тәҗрибәне бөртекләп җыйнап, педагоглар мәктәпкәчә яшьтәгеләрне тәрбияләү моделен төзи. Балалар ачык, ягымлы, мөлаем булып һәм үзләрен яратуны тоеп үсәләр.
    Эш белән мавыккан булуына карамастан, юбилярның тормышында иң мөһиме - гаилә, андагы хатын-кыз бәхете. Людмила Сергеевна биш оныгы һәм оныкчыгы Кирилл белән аралашудан тәм таба. Кызы Елена, улы Олег әниләрен игътибардан читтә калдырмыйлар. Тынгысыз, битараф булмаган, хуҗалыкчыл ханым мавыгуларга да көч һәм вакыт таба, ул бәйли, тегә, укый, чәчәкләр үстерә. Юбилярны белгән кешеләр аның тормышны яратучан, ихлас күңелле, бетмәс-төкәнмәс оптимизмы, һәр мизгелгә куанып яшәвенә сокланалар. Актив һәм сәламәт яшәү рәвеше аңа үз яшенә караганда яшьрәк күренергә ярдәм итә. Сәламәтлек һәм бәхет сезгә, юбиляр!

    Иң мөһим һәм кызыклы язмаларны Татмедиа Telegram-каналында укыгыз


    Нравится
    Поделиться:
    Реклама
    Комментарии (0)
    Осталось символов: